2017 chhungin Mizoramah lirthei chetsualna 64 thleng, mi 51 thi – CID Crime

0
813
views

Mizoram Police-a CID Crime chhinchhiah danin, nikum chhung khan Mizoramah lirtheia chetsualna tum 64 thlengah mi 51 an thi a, mi 30-in hliàm an tuar. Chetsualna thleng zinga 46 chu thihna thlen khawp chetsualna a ni a, a dang 18-ah chuan thihna a thleng lo a ni. January thla chhung khan chetsualna tum 11 thlengah mi 13 an thi a, hei hi thla khat chhunga thihna thlen tam ber tum a ni a, June, September leh Decmeber thla-ah mi 7 theuh an thi a, March-ah mi 5, February-ah 4, May-ah 3, April-ah 2 thiin, October-ah lirthei chetsualna vanga thi an awm lova, a bak thla dang zawngah chuan thla khat chhungin mi 1 theuh an thi a ni. CID Crime chhinchhiah danin, nikum chhunga lirtheia chetsualna vanga thi chu kum 2016 aiin mi 13 in an tlem zawk a ni.

Transport Department hotute chuan, lirtheia chetsualna tam zawk chu fimkhur loh vanga thleng thin a nih thu leh chetsualna thleng thin zinga eng emawzat chu pumpelh theih nia a lan thu an sawi a. Lirthei khalhtute fimkhur tura inzirtirna chu Road Safety Week hman lai chauhin ngaih pawimawh a ni emaw tih mai turin a lang nia sawiin, engtiklai pawha fimkhur nachang hriat a pawimawh tih an sawi. Transport Department hotute chuan, chetsualna thleng zingah a khalhtute ruih vang chu eng emaw zat awm mah se, ruih vang ni lova chetsualna thleng thahnem tak a awm bawk tih an sawi a, kawngpui siam dan dik tawk lo laite enfiah a, hmun hlauhawm zual laiah chhinchhiahna tar tul an tih thu an sawi a. Driving License pek danah pawh fimkhur lehzuala hmalak ni se, nu leh pa te pawhin an fate chin hriatpui se an duh thu leh zirna in leh hmun hrang hrangah zau zawka inzirtirna kalpui thin nise an duh thu an sawi bawk.