Assam Rifles leh MZP tangkhawp buatsaih Motivation Tour a kaltur College zirlai mi 30 te chu tukin khan Finance Minister Pu Lalsawta’n Aizawl Sipai Lammual atangin a vailiam. Hemi puala inkhawm tawiah Pu Lalsawta chuan, zin chhuak turte chu mahni inthununna vawng tur leh, inkawmngeih turte, hruaitute thu ngaichang thiam tur te leh an zinna atanga thil tangkai pawchhuak tura inbutsaih lawk turin a chah a ni. Assam Rifles DIG Brigadier MS Mokha pawhin thusawiin Assam Rifles chuan Friends Of The Hill People tih thupuia a neih angin Mizoram District hrang hranga zirlai naupangte tan zin chhuahna hun an lo buatsaih tawh thin tih a sawi a, MZP Hqrs. Champhai nen tangkawpin zirlai engemawtzat chu kumin Republic Day Delhi a lawmnaah tirh an lo nih tawh thu leh zirlai tam zawk tirh chhunzawm zel an tum tur thu a sawi. MZP President Pu L Ramdinliana Renthlei chuan Mizoram chhunga hnathawka awm hnam dang leh zirlaite chu zalen taka an awm chu an duh ber a nih thu a sawi a, State pawna zirlai tam zawkin Mizorama zirna in hrang hanga an pan theih nan hmalak an tum thu a sawi. He Motivation Tour-a kal zirlaite hian hapta khat chhungin India rama Sipai hmunpui hrang hrang an tlawh dawn a, Tour-ah hian Govt. T. Romana College, Govt. Johnson College, Govt. Kolasib College, Govt. J. Thankima College, Govt. Aizawl North College leh Govt. Saitual College atanga zirlai thlan chhuahte an tel a ni.
