Assam tui lianah mi 10 vel thi leh

0
1138
views

Assam-a tui lianin zual lam a pan zel a, mi 10 vel an thi leh a, tui lian hi district 25-a mi 33,00,000 velin an tuar tawh a ni. Assam State Disaster Management Authority chuan kuminah hian he state-a tui lian avang hian mi 112 an thi tawh niin a sawi a, tui lian hian Assam chuan-chung leh chuan-hnuai chhuntu lamlian, National Highway 37 a chim thlen tawh avangin inbiak pawh leh inkalpawh ngaihna a awm rih lo a, lamlianah hian motor tam tak a tang mek a ni. District thuneitute chuan chenna tur nei lote tanna khawsak lailawkna, camp 315 an din tawh a, hengah hian mi 1,68,000 vel an awm mek a, tlawmngai pawlten lawng 232 hmangin mi mangangte an chhanchhuak bawk a, mi 14,000 vel chhanchhuah an ni tawh nia hriat a ni. Tui lian zual zel avang hian Guwahati, Nimatighat, Tezpur, Goalpara leh Dhubri-a Brahmaputra lui chu a hlauhawm chin chhinchhiahna chung lamah a luang tawh a, Burhidehing, Dhansiri, Jia Bharali leh Puthimari lui pawh a hlauhawm chin chhinchhiahna chung lamah a luang bawk a, tui lian hian thil tihchhiat a ngah tawh hle a ni.