Assembly inthlanpuia hnehna chang zo ta lo, MPCC President Pu Lal Thanhawla’n khenbehna a awm chuan thawhlehna a awm ang a ti.

0
315
views

Kumin atana an party office Congress Bhavan kharna inkhawm vawiina neihah thu sawiin MPCC President chuan BJP in India rama Congress party khehbeh tumin beihpui a thlak a, Mizoramah pawh congress party chuan hnehna chang zo lo mahse ‘Khenbehna a awm chuan thawhlehna a awm ang’ a ti a, hmingchhiatna em em nei lovin sorkarna an hmang zo thei nia sawiin, sorkar lai ninna, Anti-incumbency thawm pawh MNF President hmui a\ang lo chuan an hre lo niin a sawi. Pu Lal Thanhawla chuan hmasawnna hna an thawh tam zia chu sawi ngai lovin mipuiin an hria niin a sawi a, India ram chanchinbu liante’n Mizoram hmasawnna an chhuah awl lo nia sawiin, economic thangduang an tehna GDP ah vawiin thlengin za zela pariat chuangin Mizoram chu a \hang niin a sawi.

Pu Lal Thanhawla chuan Mizoram Congress party chu Mizoram tana mamawh chhanna a ni ngar ngar \hin niin a sawi a, remna leh muanna Mizoramin a mamawh hunlaiin mahni sorkar namthluin remna leh muanna atan sorkarna midang an kian niin a sawi a, kuthnathawktute dinhmun chhe lutuk khaichhuahna tur NLUP an duang leh a, an party chu Mizoram mamawh chhanna an ni zel niin a sawi.

Bhavan kharna inkhawm ah hian Congress Legislature Party hruaitu thlan tharte hming puan a ni a, Leader-ah Pu Zodintluanga, Dy. Leader ah Pu C. Ngunlianchunga, Treasurer-ah Pu Nihar Kanti Chakma, Secretary ah Pu KT Rokhaw leh Whip atan Pu Lalrindika Ralte te thlan an ni.

CLP Leader Pu Zodintluanga pawhin thu sawiin, Congress sorkar in kum 10 chhungin hnam rotling hmasawnna tam tak an tihlawhtling niin a sawi a, Tuirial HEP, State Referal Hospital leh MIMER bakah Horticulture College te chu a langsar zual a nih thu sawiin, Sports stadium pawh district tinah an dah kim hman tih a sawi. Congress Bhavan hi Kumthar 2019 January ni 14 ah an hawng leh dawn a ni.