BJP kaihhruai National Democratic Alliance zawm turin Bihar CM sawm

0
1277
views

Pu Sharad Yadav-a chu Rajya Sabha-a Janata Dal United hruaitu a nihna atangin chawlhtir a ni a, Pu Yadav-a hian Bibar-a BJP nena sorkar siam dun chu a dodal avangin, ngaihdan hran neia ngaih a ni. Rajya Sabha-a Janata Dal (United) member-te chuan an hruaitu thar atan RCP Singh an thlang a, KD(U) MP-te hian Rajya Sabha Chairman, M Venkaiah Naidu hmuin, an thu tlukna hi an hrilh a ni. RCP Singh-a hi Bihar CM, Nitish Kumar-a zuitu rinawm tak a ni a, JD(U) hian Rajya Sabha-ah hian member 10 a nei a ni. An zinga pakhat, Ali Anwar Ansari chu Congress President, Sonia Gandhi-i’n eptu pawl hruaitute tana inkawm khawmna a buatsaihah a tel avangin an parliamentary party atangin chawlhtir a ni bawk. Thla hmasaa JD(U) leh RJD kaihhruai sorkar thlak a, JD(U) leh BJP tang dun sorkar siam a nih chungchangah khan Pu Nitish Kumar-a leh Pu Sharad Yadav-a hi an lungrual lova, state chhung hmun hrang hrang fang mek, Pu Sharad Yadav-a hian, tun thleng hian RJD leh Congress nena an thawhhona, Grand Alliance-a tel anga a la inngaih thu sawiin, JD (U) hi Nitish Kumar-a party chauh ni lovin, amah chu a neitu a ni ve tho tih a sawi.

BJP President, Amit Shah chuan National Democratic Alliance zawm turin Bihar CM, Nitish Kumar chu a sawm niin a sawi a, Nitish Kumar-a hian NDA-a tel a hnial loh thu a sawi avangin Rajya Sabha-a an party member pahnih, Party president hlui, Sharad Yadav leh Ali Anwar chuan Nitish Kumar-a laka an lungawi loh thu leh kawng hran zawh mai pawh an hnial loh thu an sawi avangin, Janata Dal (United) hi a phel mai a rinawm tawh hle a ngaih a ni. Nitish Kumar-a hian nimin khan PM, Narendra Modi leh BJP President, Amit Shah hi a kawm a, BJP nena thawk duna Bihara sorkar an siam hnua Delhi a tlawh hmasak berah NDA hruaitute hi a kawm a ni. JD (U) lam chuan, tun thla ni 19-a Patna-a an party national executive thutkhawm hunah NDA an zawm thu hi puan a nih a rinawm niin an sawi a, Pu Modi-a cabinet-ah pawh JD(U) mite an tel ve thei dawn nia sawi a ni. JD (U) hian Lok Sabha-ah member 2, Rajya Sabha-ah 10 a nei a ni.