Catalonia bial mipuite’n Spain leh Catalonia hnam puanzar kengin Barcelona khawpuiah kawng an zawh

Spain ram a\anga indan duh lotu, Catalonia biala mi tam takin nimin khan Barcelona khawpuiah kawng an zawh a, mipuite hian Spain leh Catalonia hnam puanzar kengin, Catalonia chu Spain ram a nih thu leh inlak hran ai chuan a huhova an chak zawk thu an aupui a, Spain ram PM, Mariano Rajoy-a chuan Catalonia bial hotuten zalenna an puan chuan Catalonia sorkar paihthlak a, inthlanna buatsaih a hnial loh thu leh Catalonia bialin mahnia inrelbawl theihna an neih pawh hlih a hnial loh thu a sawi a ni. Puan tawh angin, Spain ram hmar chhaka Catalonia bial, mi 75,00,000 vel awmna-ah hian tun thla ni 1 khan Spain laka zalenna puan chungchangah mipui ngaihdan lak a ni a, vote thlaktu zaa 90 chuangin zalenna puan an duh nia hriat a ni a, amaherawhchu heng mite Catalonia-a vote thlak thei zawng zawng zaa 43 chauh an nih avangin mipui ngaihdan dik tak a tling lo nia sawi a ni. Spain rama awm zui zel duhtute chu ram pawnah an awm avangin vote an thlak ve thei lo nia hriat a ni bawk a, hetih rual hian mipui ngaihdan lakna neih a nih dan chungchangah hian dan anga thil kalpui a nih loh vangin mi tam takin an pawm lova, Spain sorkar chuan vote thlak titawp tur hian police tam tak a tir a, he thila buaina chhuakah hian mi 900 vel an hliam nia sawi a ni.