Central Young Chakma Association leh Central Mizoram Chakma Students’ Union-in Bizu kut an hman dawn avangin April ni 8 atanga ni 30 inkarah Chakma Autonomous District Council inthlanpui huaihawt lo turin Mizoram Sorkar an ngen. He ngenna hi Larsap, Lt. General, Nirbhay Sharma hnenah pawh an lo thlen tawh niin an sawi a, Chakma pawl pahnih chuan, Bizu kut hi kum tin April ni 13 leh ni 15 inkarah lawm thin a nih thu leh he kut lawm hma emaw a lawm zawh hnu lawka inthlanpui neih a nih chuan mipui rilru a tichiai thei dawn niin an sawi a, District Council inthlanpui chu hun remchang zawka buatsaih turin Sorkar an ngen a, hei hi tihhlawhtlin a nih loh chuan he inthlan neih tur hi Boycot a nih tur thu an puang a ni. Central Young Chakma Association leh Central Mizoram Chakma Students’ Union chuan, tun hnaia CADC Sorkar hnuaia Group A leh B hnaruak 18 hnawhkhahna tur Advertisement tihchhuah a ni chu lawmawm an tih thu leh heng hnaruak hnawhkhah turah hian a tling leh tlakte chauh lak an nih theih nan sorkar chu dik taka thil ti tura an duh thu an sawi bawk.
