Central YMA chuan Mizorama hnamdang sumdawngte chungchang pawl dangte nena inrawnkhawma zau zawka sawiho tha a ti. Central YMA Executive Committee nimina thukhawm chuan Mizoram sorkar nen an lo sawi dun tawh angin Vishal chungchang zirchiang tura nikuma Aizawl DC an tih chu chak zawka bawhzui an duh thu te, hnamdang sumdawngten Mizoram mite an chimral lohna tura Trading Regulation neihna tura ngenna ziaka sorkara an lo thehluh tawh pawh chak zawka bawhzui tul an tih thu te an sawi a ni. He inkhawmah hian Arunachal Pradesh pawhin Trading Regulation siamin a hmang mek tih tarlan a ni a, hei hi zirchiang turin Mizoram sorkar pawhin sorkar officer te a tir tawh a, an zirchianna report chu rang taka bawhzui turin Mizoram sorkar an beisei tih he Committee Meeting-ah hian tarlan a ni bawk a ni. CEC Meeting hi an President, Pu Vanlalruata’n a kaihruai a, hetah hian Mizorama kutdawh tam tak awm chu pawi an tih thu sawiin, kutdawh an awm lohna tura hmalak zui nan an dinhmun zirchiangtu tur Committee an din nghal a ni.
