CYMA leh Kumpuan Committee kut tuartu an inrem

0
1409
views

Kar kalta Thawhtan zana Central YMA kumpuan duty ten Zanlawn tlangval pakhat kut an thlak thuah Central YMA leh kutthlak tuartute chu vawiin khan an inrem.


 

Zonet Report: by K. Lalhruaitluanga

Kar kalta Thawhtan zana Central YMA kumpuan duty ten Zanlawn tlangval pakhat, Treasury Square atanga man-a Central YMA Office-a an sawisak thu hian social media facebook leh whatsaap lamah inhnialna a chawk chhuak nasa hle. Zanlawn tlangval Lalchhuanawma hi Treasury Square, Congress Bhavan bula Hotel sak meka inhlawhfa a ni a, kutthlak a nih dan ama sawi chu Social mediaah a darh nasa hle.

Thil thlen dan ka zawhna min chhan danin, Lalchhuanawma hian kar kalta thawhtan zan dar 10 vela mu tura a inbuatsaih laiin an Hotel sak mek bulah hmeichhe au chunga tlan leh a hnunga mi pa 3 in an um lai a hmuhin chhan ngai nia a hriat avangin a va inrawlh a, a umtute hian kutkawl buntirin YMA Office kut an thlak zui ta a ni. Lalchhuanawma hian a tuk Thawhlehni khan Aizawl PS ah FIR a thehlut tih min hrilh bawk. YMA hnuaia kumpuan duty te chet dan hi mi tam takin an sawisel nasa a, Human rights bawhchhiatna nasa tak a nih bakah hetianga midang kutthlak leh hrehbeh luihte hi IPC 323 leh 339 bawhchiatna a ni an ti a. Kutthlak tuartu Lalchhuanawma hian Aizawl Police Station ah FIR thehlut mahse, police ten kutthlaktute man an nei lo chuan sawi a hlawh hle bawk.

Ka zawhna chhangin Central YMA President Pu Vanlalruata chuan he thil thleng hi pawi a tih thu a sawi.

Kut inthlak anih atanga hapta khat tlinna chiah, vawiin khan CYMA hruaitutte chuan Lalchhuanawma hi Central YMA office ah kovin an kawm a. Hemi hnua ka zawhna chhangin Lalchhuanawma hian Central YMA hruaitute’n ngaihdam an dil avang leh amah pawh an khua Zanlawn Branch YMA ah executive Committee member a nih ve bawk avangin YMA mualpho lohna tura inrem an rawtna chu a pawm ta tih a sawi a, FIR a thehluh pawh a hnukdawk leh nghal tih a sawi.