Delhi Chief Secretary Anshu Prakash-a AAP MLA thenkhatin kut an thlak nia sawi a ni. Thuhretute sawi dan chuan Prakash hi nizan khan Delhi CM, Arvind Kejriwal-a chenna inah, AAP-in advertisement an tih chhuah chungchangah koh a ni a, an inhnial chhoh tak vangin, AAP MLA pathum velin kut an thlak ta mai niin IAS pakhatin a sawi a, Prakash-a tarmit-te pawh hi an tih keh sak niin a sawi bawk. He thil thleng chungchangah hian Prakash chuan Lt Governor, Anil Baijal pawh nizan khan a hmu nghal a, vawiin khan IAS officer intelkhawm-te chuan Pu Baijal hi an hmu ve bawk a, an lungawi loh thu an thlen rualin, mipui tibuai zawnga nawrh erawh an tum loh thu an sawi a ni. AAP-te chuan he thil thleng hi inpuhchhiatna mai mai niin an sawi thung a, Chief Secretary hi tunhnaia Aadhaar Card hman dan thil kal dik lo vanga ration sem buai chungchang vanga koh a ni zawk niin an sawi a, an zawhna te pawh chhang duh lovin, a kir leh ta zawk niin an sawi ve thung.
