Doklam atangin India leh China sipaite inhnuk dawk

0
946
views

Doklam-a ramri chungchanga buaina chuan ziaawm lam a pan dawn niin a lang a, Ministry of External Affairs chuan vawiin khan India leh China sipaite chu helai hmun atang hian zawi muanga hnuh kir an ni tih a sawi a, Doklam-a buaina chinfel tumin India leh China sorkar chu kar eng emaw zah liamta atang khan an inbia tih a sawi bawk. Ministry thuchhuah tarlan danin, ram pahnihte hian an thil duh leh an ngaihdante tlang tak leh awmze nei taka an sawi dun hnuah, Doklam atanga ramri sipaite lak chhuah chu an remti ve ve a ni. National Security Advisor, Shiv Shankar Menon-a chuan thlaleh-a neih tur, ram thang mek panga- Brazil, Russia, India, China leh South Africa ram hruaitute inhmuhkhawmna, BRICS summit chu India leh China-in mumal taka an buaina an chinfel hma chu a hlawhtling thei dawn lo nia sawiin, inbuatsaihna tha tak nen lo chuan hmachhawn chi a nih loh thu a sawi. Puan tawh angin, Doklam hi Bhutan leh China-in an ramah an chhal ve ve a, Bhutan ngenna anga India sorkarin Doklam-a China sipaite kawng siam titawp tura sipai a tirh avang khan buaina hi a intan a, India hian Doklam chungchangah hian Bhutan ngaihdan a tawmpui avangin China sipaite hnathawh hi a dodal a ni.