He thu hi vawiina MNF Party office Hnam Run inkhawm-ah thu sawiin Pu Lalchhandama Ralte hian, zirtirtu nghet la turin MTET nei te chauh lak theih an ni tih chu sorkarin a hria a, zirtirtu an lak tur erawh MR Skill-II an ni a, trained teacher chauh lak an ni dawn a, dan bawhchhiatna a awm lo a ni a ti.
Eptu Party ten party mi te dahngheh tumna nia an puhna chhangin Pu Lalchhandama Ralte hian, zirtirtu lak turah a khaw mi train chhuak an awm chuan lak an nih tur thu an sawi mai zawk niin a sawi a, ZPM, Congress, MNF an sawi lo tih sawiin dahngheh an nih dawn pawhin MTET nei lo chu dahngheh theih an ni dawn lo a ti.
Mi\henkhatin zirtirtu awmsa semrual ni se tia an sawi pawh chhangin Mizoram chu khaw te tak te te-a in bawk hrang thliah a nih avangin phai ram anga Teachers People Ratio anga chhut chi a ni lo a ti a, Class tin daih zirtirtu pek chu Sorkarin a tum a ni zawk a ti.
Minister hian hmanni lawka Sorkarna fawng vuantu Congress party-in Mizorama zirna an kalpui dan leh an hnutchhiah dan mipuiin an la theihnghilh lo a ni a ti a, Congress party thusawi \henkhat-ah dik lova mipui kaihhruai tumna a awm niin a sawi.
Education Department-a IV Grade 54 lak tur chungchang-ah dilna form la chhuak mi sang 4 chuang an awm tawh tih Pu Lalchhandama Ralte hian a sawi a, Congress-a NSUI in dilna form man a to lutuk tih sawiin ngaihtuah \ha turin sorkar-ah an thlen a ni a ti a, dilna form man chu an pu te Sorkar laia an lo siam anga an kalpui mai a ni a, MNF sorkarin tihdanglam a la neih loh thu NSUI te hi a lo hrilh tih a sawi bawk.
