Fakselna 28th March, 2018

0
947
views

PWD-in Tlawng leh Pukpui inkar kawngpui a siam mekah Lunglei mipuite an lungawi loh avangin PWD EE, SDO leh JE te Transfers an ni tih PWD Minister, Pu Lal Thanzara’n a sawi.

Pu Lal Thanzara chuan, Tlawng leh Pukpui inkar kawngpui kilometre 1.13 a thui hi nikum November ni 27 a\anga thawh \an a nih thu leh hnathawhna tura sum ruahman chu cheng nuai 300 a nih thu a sawi a. Helai hmunah hian lung\ha avan avangin kilometre 20 chuanga hla a\angin lung lak a ngai a, tuna an lung hman pawh hi Thenzawl bul Sentezel leh Kei\um thlang Tuichang Quarry a\anga lak a ni a ti a, tuna a thawktute Tender chhuah lova lak a nih chhan pawh hmanhmawh taka hna thawh a ngaih avangin \ha taka thawk \ha thei tur nia ngaihte hnenah Contract hi pek niin a sawi. Zawhna dang a chhannaah PWD Minister chuan, Ramrikawn kaltlanga Sairang Sihhmui leh Melriat, Falkawn inkar kawngpui siam tum chu mipui tan \angkai dawn mah se, he hmalakna hi JNNURM hnuaia thawh a nih thu leh he scheme hi a tawp tak avangin ruahmanna pawh tihtawp ve nghal a nih thu a sawi a. Hetih rual hian Sihhmui a\anga kawng thar siam turin ruahmanna siam mek a nih thu leh a senso atan pawh cheng vbch 100 ruahman a nih thu a sawi a. Hei hi tihhlawhtlin a nih chuan Aizawl tibuai lova Airport panna kawng pawimawh a ni dawn tih a sawi.
———-

Nimina Zophai hmun tlawhtu Home Ministry-a Joint Secretary Satyendra Garg a’n Inner Line Reserve Forest Area huam chhunga dan kalha thil sak zawng zawngte chu tih chhiat vek tur a ni a ti.

Joint Secretary Satyendra Garg ho hian Mizoram leh Assam sorkar aiawhte telna, Fact Finding Team in Zophai hmun hi nimin khan enfiahin, Zophai hmunah vek hian inbiak zui a ni a. Inbiakna zawhfel hnua chanchinbumite zawhna chhangin Satyendra Garg hian Inner Line Reserve Forest chu notification hmanga fel taka chhinchhiah a ni a, a chhunga In emaw thil dang emaw sak chu dan kalh a ni a ti a. Hailakandi, Cachar leh Kolasib District aiawhte telna Joint Committee dinin, hei hian April ni 30 ral hmain Reserve Forest huama dan lova thil sak zawng zawngte an enfiah vek ang a, chung te chu ti chhe turin dan hnuaiah hmalak zui a ni ang a ti.

Zophai hmun enfiahtu Fact Finding Team-ah hian Mizoram lam aiawhin Home Secretary Pu Lalrinliana Fanai, Addl Secretary Pu Lalbiakzama leh OSD Home Pu David Lalthangliana te bakah Revenue Director Pu C. Lalpeksanga, Kolasih DC and SP te leh MZP President Pu L Ramdinliana Renthlei leh Cetral YMA President Pu Vanlalruata te an tel a, Assam lamah Home Secretary LS Changsen DGP Border RM Singh leh Hailakandi DC leh SP te an tel a ni. Fact Finding team hian an report kimchang chu April ni 5 ah Union Home Secretary hnenah an thehlut ang a, chumi hnuah hmalak zel dan tur chu la sawi ho leh a ni ang. Inbiakna-a thutlukna siam danah hian Inner Line Forest Reserve huam chhungah Assam lam hmalakna tih chhiat tur tam tak a awm dawn laiin, Mizoram lamah erawh tih chhiat tur a awm meuh dawn lo niin a lang a, thutlukna siam danah Mizoram lam chan a \ha zawk hle niin a ngaih theih a ni. Zophaia inbiakna neih a nih dan report kimchang hi zanin dar 8 ah Zonet Zawlbuk channel ah tih chhuah a ni ang.
—————–

Assembly Budget session neih meka MLA 5 – Pu K. Sang\huama, Pu TT. Zothansanga, Pu Lalthanliana, Dr. K. Beichhua leh Pu Lalruatkima ten Pay Commission 7-na chungchanga an zawhna in\awm, House-a chhan a nih hmaa a chhanna Social media-a thehdarh a nih chu chhui chian a nih tur thu leh a mawhphurtute chu an phu tawk hremna pek an nih tur thu Finance Minister Pu Lalsawta’n a sawi.

Vawiin Budget session-ah MNF member, Pu Lalruatkima chuan Pay Commission 7-na chungchanga MLA 5-te zawhna in\awm chu chhan a nih hmain nizan khan Social Media-a thehdarh a nih thu sawiin, hei hian House zahawmna a tichhia nia a ngaih thu a sawi a. Hei hi chhangin Finance Minister chuan, Chief Minister remtihnaa he thil hi chui chian a nih tur thu a sawi a ni.
———–

Sentut leh Sentut na lo deuh chi Rubella venna Vaccine pek beihpui Health Dept in a thlak dawn. World Health Organisation puihna-a Health Dept. in sentut venna vaccine pek beihpui thlak a tum dan hi WHO hnuaia State Medical Officer Dr Lalhlimpuii’n vawiin khan chanchinbumite a hrilhfiah a. Sentut leh Rubella natna chu enkawla dam vat thei a nih laiin ngaihthah chuan thihna leh piansualna thlen thei a nih thu a sawi a, hritlang anga inkaichhawn awlsam tak a nih avangin fimkhur a \ul tih a sawi. Dr Lalhlimpuii chuan, Sorkar laipui duhdanin Sentut leh Rubella natna laka mipui te an him theih nan invenna (Vaccine) chu rampumah pek tur a nih thu a sawi a, State 15 ah invenna pek tawh a nih thu leh naupang vaibelchhe 8 te pek an nih thu a sawi. Dr Lalhlimpuii chuan, Vaccine hi kumin April ni 16 a\angin Mizoramah pek \an tum a nih thu leh thlakhat chhunga zawh tura ruahman a nih thu a sawi a, naupang thla 9 leh kum 15 inkar te pek an ni ang a, zirna in hrang hrang leh in ah te kalchilha pek a nih tur thu a sawi. State Immunization Officer Dr Lalzawmi leh UNICEF Health Officer Dr Maulik Shah te pawhin thu an sawi a ni.
————-

Finance Minister, Pu Lalsawta’n Sorkar kumthar, 2018-19 chhungin pay commission 7-na rawt anga sorkar hnathawk hlawh pek tum a ni tih House a hrilh. Member 5 – Pu K. Sang\huama, Pu TT. Zothansanga, Pu Lalthanliana, Dr. K. Beichhua leh Pu Lalruatkima te zawhna in\awm chhanga he thu hi sawiin, pay commission 7-na rawt anga sorkar hnathawk hlawh pek tur a nih leh nih loh zirchiang turin nikum November ni 13 khan State Planning Board Vice Chairman, Pu H. Liansailova kaihhruai Committee din a ni a, he Committee-a mawhphurtu dangte chu Minister of State, Pu KS. Thanga, Finance secretary hlui, Pu Lalthansanga leh Taxation secretary, Pu Vanlal Chhuanga an ni tih sawiin, an Report hi sorkar-ah la thehlut chian lo mah se, sorkar kum thar 2018-19 chhung hi chuan pay commission 7-na rawt angin sorkar hnathawkte hlawh hi pek ngei tum a ni tih a sawi. Pu Lalsawta chuan, pay commission 7-na rawt anga sorkar hnathawkte hlawh pek a nih chuan thla khatah Sorkar-in Rs. 46,93,74,096 a sen belh a \ul thu leh kum khata sum sen belh ngai zat chu Rs. 5,63,24,89,152 a nih thu a sawi a. Finance Department-in hlawh siam\hatna atana rawtna a siam chu nikum October ni 25-a Council of Ministers \hukhawmin a zirchiangtu tur Committee din ni se a tih angin, Committee hi nikum November ni 13 khan din a nih thu leh Committee hian a zirchian mek thu sawiin, thla 6 chhungin Report a thehlut ang a, chuta \ang chuan Cabinet-in thutlukna a la siam dawn tih a sawi.
———–

Vawiin session-ah Minister pahnih, Pu Lal Thanzara leh Pu C Ngunlianchunga-te hna chanpual nakum sorkar kum chhunga enkawlna tur sum ruahmante sawihova lungrual taka pawmpui a ni. Pu Lal Thanzara hna chanpualte chu Medical and Public Health, Information and Public Relations leh Public Works Department-te an nia, heng Department pathumte enkawlna tur sum ruahman chu Rs 11,98,90,11,000/- a nia, Pu C. Ngunlianchuanga hna chanpual te chu Printing and Stationery, Disaster Management and Rehabilitaion leh Animal Husbandry and Veterinary Department te an nia, an vai a enkawlna tur sum ruahman chu Rs 1,01,84,99,000/-a ni. Minister 2-te Demand sawihonaah hian member \hahnem takin thu an sawia, thusawitu tam tak chuan Health Department in hmun hrang hranga mipuite hriselna atana hna a thawh te, nausen kum 1 hnuai lam thi leh nu nau chunga thi tlemna tura hmalak dante, Falkawna Mizoram Institute of Medical Education & Research din tura hmalakna neih mek leh hmasawn chhoh zel dante, MR bill endik tura Mizoram State Heatlth Care Society hman tum a nih chuan, chak zawka hna an thawh theih nan tihchak a \ul thute, HIV/ AIDS hrik pai pung chho an enghelh thu leh a darh zel lohna tura chak zawka hma lak tul an tih thute, an bial \heuha an mamawhte an tarlang a ni. Member tam tak chuan kumin \hal chhunga PWD hna thawh dan chu \ha leh lawmawm an tih thu an sawia, nikum a fur ruahtui tla hma leh tla rei vanga harsatna tawhte an sawi chhuak bawka, member \henkhat chuan Mizorama kawng siam dan thar, PWD in an hman chu Mizoram sik leh sa leh leilung awm dan nen a inmil loh vanga kawngte hi chhe hma a ni em tih enfiah ngai niin an sawi a ni. Member thusawitu zingah Information and Public Relations Department ram leh a \henawma awm, Printing and Stationery Department ram chinfel ngai chungchang an sawi chhuaka, Cabinet meeting chinfel tura dah niin an sawi a ni. Member tam takin AH & Vety Department hna thawh dan an faka, kawng tam takah hmasawn nia sawiin ram chaw siam chhuahna khawl Mizorama bul chu lawmawm an tih thute, ran chaw siamna tura Vaimin tam zawk thar , NLUP hnuaia vawk leh bawng vulh tur sem chhuah a nih hma a chik zawka an hrisenna dinhmun enfiah tul an tih thu an sawi a ni. Member thusawitu tam takin Disaster Management and Rehabilitation Minister Pu C. Ngunlianchunga hna thawh dan leh a Department in vanduaina tawkte a \anpui dan chu \ha an tih thu an sawia, nikuma a damlo, \ha taka dam chhuak leha, a hna \ha taka a thawk zui thei chu an lawmpui thu an sawi bawk a ni. Printing and Stationery Department chungchang sawitu te chuan Sorkar Department zawng zawngin Sorkar duh dan and ngeiin an mamawh he Department a\ang ngei hian an lak \hin \ul an tih thu an sawi a ni. Hemi hnu hian a changtu Minister pahnih, Pu Lal Thanzara leh Pu C Ngunlianchuanga-ten member te thusawi chhuahte hi an sawifiah a, Minister pahnihte hna chanpual enkawlna tur sum ruahmante hi House chuan a pass ta a ni.
————-

Vawiin chawhma khan Thenzawl Venghlunah Pi Neihthiangi-te chhungkaw chenna in, Assam Type chu bungraw engmah chuh hman lohvin a kang ral vek. Vanneih thlak takin he kangmei chhuak vang hian thi an awm lova, In neitu nu, Pi Neithiangi, hi inkan lai hian bualinah a inbuala, a au thawm hriate chuan dam takin an la chhuaka, hemi hnu hian inkang a nasat avang leh Gas bur te a puah avangin \helh theihlohin a awm zui ta a ni. He kangmei chhuak hian an buangrua leh thil neih dang cheng nuai 6 hu vel a kang ral a ni. Kangmei chhuah nachhan hi hriat chian theih nilo mahse, Electric kal sual vang nia rin a ni. Kangmei tuartute mamawh pe turin Branch YMA chuan \anpuina a khawna, Serchhip Bawrhsap leh Thenzawl SDO Civil-te pawh hriattir nghal a ni.
————–

Disaster Management and Rehabilitation Minister, Pu C. Ngunluianchunga’n sorkar kum kal mek 2017-18 chhungin Mizoramah khuarel chhiatna vanga thi mi 19 an awm thu leh an zinga 17 chu zangnadawmna pek an nih tawh thu House a hrilh. MNF member, Dr. K. Beichhua zawhna leh zawhbelhna dangte chhanga he thu hi sawiin, khuarel chhiatna vanga thite chu Aizawl District-ah mi 5, Lunglei District-ah 9, Siaha leh Lawngtlai District-ah 2 ve ve leh Champhai District-ah mi 1 a nih thu a sawi. Pu C. Ngunlianchunga chuan, heng vanduaina tawk zinga mi 17 chu cheng nuai 4 \heuha ral an nih tawh thu sawiin, pahnih pek an la ni loh chhan chu an awmna District Bawrhsap hnenah dilna thlen phawt a ngaih vang a nih thu leh pakhat chu nikum November thlaa Dawn khuaa Burma helpawlte nen buainaa Bomb rah puah vanga thi a nih thu sawiin, hei hi chu Sorkar kum thara pek tura ruahman a nih thu a sawi. DM&R Minister chuan, nikum fur chhunga Mizoram hmun hrang hranga khuarel chhiatna avanga in leh lo chhia leh huan thlai chhiate \anpui nan Sorkar laipuiah sum dil a nih thu leh tunah hian State Disaster Response Fund a\anga eng emaw zat pek a ni tawh thu a sawi a. Zangnadawmna pek tur sum hi State Sorkar-in a ngah loh avangin Sorkar laipuiah rs. vbch 106 dil belh a\angin Rs. vbch 35 hmuh a ni a, he pawisa hi sorkar kum tharah chuan pek hman tum a nih thu a sawi.
———

Assembly Budget Session neih meka Mizoram sorkar hnathawk ten 7th Pay Commission anga hlawh an lak dawn leh dawn loh zawhna vawiin a Finance Minister Pu Lalsawta chhanna tur Social Media lama ti darhtu chhuichhuak turin MNYF in sorkar an phut. Hemi chungchanga vawiin a thuchhuah an siamah MNYF chuan, Assembly zawhna leh chhanna a hun hmaa social media lama a putru chu House zahawmna tihbawrhbanna nia an ngaih thu leh mipui zah lohna lian tak a nih thu an sawi a, chhuichhuah harsa a nih an rin loh thu leh rang taka hma la tura sorkar an phut thu an sawi. MNYF chuan, he thil thleng chungchang hi House Leader Pu Lal Thanhawla hming tih hliauna nasa tak a tling tih sawiin ani pawhin a ngai thutak hle tura an ngaih thu an sawi bawk.
—————–

Mizoram sorkar chuan Police Officer \hahnem tak a sawn. Nimina an mahni sawnna thupek a chhuah danin Addl. DGP Pu Mukesh Kumar Meena chu ACB Director atan sawn a nia, IGP Inteligence Pu Neeraj Thakur chu IGP hna chelh tura sawn a nia, Pu ACB Director Pu LH Shanliana chu IGP Inteligence Law and Order atan sawn a nia, DIG Northern leh Southern Range ni \hin, Pu Joseph Lalchhuana chu DIG Training atan dah a nia, Pu John Laldina, OSD Hqrs. hna chelhtu chu DIG Hqrs atan dah a nia, DIG Training Pu Lalbiakthanga Khiangte chu DIG Northen Range atan dah a nia, Pu Davesh Kumar Mehta chu Mamit SP atan dah a nia, Aizawl SP ni lai, Pu Neihchungnunga chu DIG Southern Range atan dah a ni.
————–

Kum 2018-19 Mizoram budget-ah zirna kaihhnawih study tour leh excursion a tan budget-ah dah a ni lo chu hriatthiam harsa an tih thu MSU-in a sawi a. Zirlai harsa zawkten innghah nana an hman leh hmuh hlan an nghahhlelh em em, Scholarship leh Stipend atan Rs. nuai 41 chauh dah a ni chu zirlaite hmakhaw ngaih lohna lian takah a ngai tih an sawi. MSU-in a zirchianna a\angin kum 2016 – 17 chhung khan Scholarship / Stipend-ah Rs. nuai 82.29 hman a ni a. Kum 2017-18 ah Rs. nuai 87 hman ral tura ngaih a ni a, hetiang a nih laia kum 2018-19 budget-ah Rs. nuai 41 chauh dah a ni chu pawm harsa an tih thu a sawi a ni. ——-

MHIP Aibawk Block Conference vawi -39 na chu vawiin khan Hualngohmun-ah hman a ni. A hmanpuitu bialtu MLA Pu KS Thanga chuan, khawtlang nun nuam leh \ha nei turin nu te chungah mawhphurhna nasa tak a innghat a ni a ti a, nuho kalkhawm chu an mawhphurhna hrang hrang hlenchhuak tura theihtawp chhuah turin a chah a ni. Pu KS Thanga chuan, Medical College nei tura sorkarin Falkawn Referral Hospital a thuam \ha mek chu a bialchhung mipui te tan chhawrnaawm tak a nih tur thu a sawi bawk. Conference hi Block President Pi C Ramropuii’n a kaihruai a ni.
—————

Ngopa Block MHIP Conference chu nimin khan Ngopa Jubilee Hall-a neih \an a ni a, zanin hian a \iak ang. Nimin khan rorel inkhawm neih niin, an pawl hmalakna tur hrang hrang an ngaihtuah bakah kum 2018-20 atana hruaitu thar tur an thlang nghal a ni.
Nizan leh vawiin nileng khan Inkhawm buatsaih a ni a, hetah hian hmeichhiaten nasa taka hma an sawn mek thu te, nasa zawka hmasawn tura \anlak a ngaih thu te, ei leh bar zawn kawnga hnathawh tur thlan fimkhur a tul \hu leh naupang ven fimkhur a \ul thu te an inzirtir a ni. Nopa Block MHIP huam chhungah hian Branch 19 awmin, Branch 16 atangin Conference Palai \hahnem tak an tel a, nkkumah chuan Saichal Branch-in Block Conference hi a thleng dawn a ni.
——-

Govt Aizawl North College NSS leh Red Ribbon Club in Good Friday pualin vawiin khan thisen unit 233 an pe a, thisen hi Civil Hospital Blood Bank a thawktuten an College ah an lak sak a ni. Thisen petute hi mipa 170 leh hmeichhia 63 an ni.
—————-

Vawiin khan Aizawlah khaw lum lai berin celsius degree 30 a ni a, a vawh lai berin celsius degree 13.6 a ni a, nizan a\anga vawiin thlengin 16ml ruah a sur.
——

Naktuk, Zirtawpni-ah chuan khaw lum lai berin Celsius Degree 29 vel, a vawh ber laiin Celsius Degree 14 vel a nih rin a ni. Zing dar 5:15-ah ni a chhuak ang a, tlai dar 5:34-ah a tla leh ang.
——

Central Board of Secondary Education CBSE in Class 10 mathematics leh class 12 economics subject ah te exam a buatsaih nawn dawn tih a puang. Class 12 Economics zawhna hi a putru nia sawi a ni a, hetihlai hian class 10 mathematics exam nawn tura tih a nih chhan erawh la puan chian leh tur a ni. Class 10 mathematics exam hi vawiin khan neih a ni. CBSE thuchhuah chuan Board Examination hlutna leh ropuina vawnghim turin exam buatsaih nawn tura thutlukna hi siam a ni tih a tarlang a, exam hun tur chu CBSE website ah hapta khat chhunga tarlan a ni ang.
————-

AIADMK member te Cauvery River Water Management Board din ngiata an au bengchhen leh avangin Lok Sabha inkhawm tihtawp leh a ni. Rorel inkhawm tihtawp lailawk anih hnua rorel chhunzawm tura member te an luh leh rualin member lungawi lo te hi House laiah chhuak khawmin an aurual leh a, hetianga inauh buaina karah hian Parliamentary Affairs Minister Ananth Kumar chuan congress party chu rorel inkhawm tih buai reng tumah a puh a, sorkar rin tawk lohna motion sawiho turin sorkar chu engtiklai pawhin a inpeih reng a ni a ti a, nimin lama eptu member ten motion sawiho ngiata thuziak chi hrang hrang house chhunga an keng chu demawm a tih thu a sawi bawk. Congress member Mallikarjun Kharge chuan an party in motion sawiho chu a thlawp tih sawi nawnin, Speaker chu motion sawihona hun hawng turin a phut tih a sawi ve thung a, member te au bengchheng karah hian Mahajan chuan house ah rorel theih a ni lo tih puangin motion chu lak theih a ni lo tih a puang a, April ni 2-a chhungawm leh turin rorel inkhawm chu a titawp zui a ni.
————-

Ram Navami kawngzawh-a buaina chhuak chungchangah thil awmdan sawifiah turin Central Sorkarin West Bengal sorkar a ti. Union Home Ministry chuan a tul anih chuan state sorkar chu venhimna kawngah puih a inpeih tih a hriattir nghal a, ni 2 kalta chhung khan West Bengal ah hian Ram Navami puala kawng zawhtuten hmun hrang hrangah buaina an chawk chhuak a ni. Asansol bial a\anga thlan tlin BJP MP Babul Supriyo chuan Mamata Banerjee kaihhruai West Bengal Sorkar chu sakhaw hrang betute kara buaina chawk chhuaktuah a puh a, Governor Keshari Nath Tripathi pawh biain buaina chhuak chungchang hi a sawipui a ni. Raniganj ah Thawh\anni khan Ram Navami puala kawngzawhtute an inti buai a, mi pakhat chu hrei-a chehhlum a ni a, Bomb puak avangin Police Dy Commissioner chuan a kut lehlam a chan a ni. Dawr tam tak suasam a nih bakah in tam tak suasam-a hal a ni tawh bawk.
————–

Mahatma Gandhi thah a nih dan chhui nawn leh dilna lut chu Supreme Court in vawiin khan a hnawl. Justice SA Bobde leh L Nageswara Rao te chuan he thu hi ngaihtuahin Mahatma Gandhi thih dan chhui nawn leh ngenna hi an hnawl a. Ngaihtuah nawn ngenna thehluttu hian finfiahna tur thil thar, tunhmaa la hmuh chhuah loh a nei niin a insawi a, he finfiahna thar nia sawi, lo enfiah hmasatu pawhin thubuai ngaihtuah nawn hi \ul a tih loh thu a lo sawi tawh a ni.
———–

Rahya Sabha ah state hrang hrang 17 a\anga member 60, April leh July thlaa an term hmang zo tawh turte vawiin khan thlah an ni. Thlahna inkhawma thusawitu Prime Minister Narendra Modi chuan Rajya Sabha chu rorelna hmun zahawm tak, India ram democracy-a hmun pawimawh a ni a ti a, member kal chhuak turte chuan an finna leh thiamna te ram tan \angkai takin an hmang a ni a ti a, Triple Talaq Bill sawi hona-a an tel ve ta lo tur erawh pawi a tih thu a sawiin thil pawimawh bikah te chuan Prime Minister office chu an thurawn dawng turin a inhawng reng a ni a ti. Chairman M Venkaiah Naidu pawhin member kal chhuak turte chuan house rorelnaah an thawh hlawk \hin hle tih a sawi a, Rajya Sabha rorelnaah hmeichhia ten an thawhhlawk \hin hle tih pawh sawiin,. hetihlai hian hmeichhe member awm zat hi zaa 11.7 vel chauh a la ni tih a sawi lang a ni. Member kal chhuak turte zinga mi, Deputy Chairman Prof. PJ Kurien pawhin thu a sawi a ni.
———–

Nimin lama puan tawh, Beijing-a North Korea rel hmuh-ah khan Kim Jong-Un a chuan ngei thu leh, China President, Xi Jinping a hmu ngei tih nemngheh a ni. China sorkar chanchinbu, Xinhua chuan ram pahnih hruaitute hian nuclear ralthuam siam chungchanga buaina awm mek chungchang an sawi dun tih a tarlang a, Kim Jong-Un South Korea leh US-te inbiakpui a remtih avangin, boruak a dai \an dawn nia a sawi thu leh, South Korea nena thawhdunna \ha tak neih a duh thu te pawh a sawi niin Xinhua chuan a tarlang bawk a ni.
———-

Russia-a mi 64 thihna kangmei chhuak vanga mipui lungawilo pungkhawm-te chuan an ram President Vladimir Putin-a bang turin an phut. Mipui lungawilo pungkhawmte chuan kangmei chhuah chhan chu thuneitute fimkhur tawk loh vang a nih thu leh, kangmei chhuah hnua sorkar thiltih dan chu an lungawi loh thu te an sawi a, thudik thup tum leh hlemhletna khuhbo tumna a nih thu an sawi bawk a ni. Mi \henkhat chuan kangmei chhuahna, sumdawnna hmunpui kha, kangmei chhuak palh thei lakah a him tia ziak turin, thuneituten thamna an dawng niin an sawi a, thuneitute’n thi zat mi 64 an awm a tih pawh an awih loh thu leh tun thlenga an chin la hriat loh, mi 85 hming an chhinchhiah tawh thu te an sawi bawk a ni. Putin chuan he thil thleng hi thuneitute dawngdah vang a nih thu leh, a mawhphurtute a hrem ngei tur thu a sawi ve bawk a ni.
———-

UK-a Russia mi, enthlatu hlui tûra hrai a nih chungchang thubuai kal zelah, khawthlang lam ramte’n Cold War an \an thar leh niin Russia chanchinthar thehdarhtute’n an sawi. Puan tawh angin Sergei Skripal leh a fanu-te beih an nih vang khan, UK leh ram dang 23-te chuan an rama Russia palai-te an hnawtchhuak tawh a, EU pawhin Russia demin, an member 17-te chuan an ram a\angin Russia palai-te an hnawtchhuak ve bawk a ni.
———–

Myanmar Parliament chuan vawiin khan an ram President atan Aung San Suu Kyi \huihruai hnai tak, Win Myint a thlang. Puan tawh angin, Myanmar-ah sipai-in kum 50 chuang thuneihna a lekkawh hnuah, kum 2016 a\ang khan civil sorkar siam thar leh a ni a, thuneihna pumhlum pek ni lo mahse, sipai leh civil sorkar pahnih-te’n ram an enkawl a ni. Win Myint hi ukil a ni a, Suu Kyi-i party, NLD-ah a tir a\angin a tel a, kum 1988-a sipai lalna paihthlak an tum \um khan man a ni a, kum 2010 khan NLD Central Executive Commitee member-ah dah a ni ta a ni.
———–