Goa, Delhi leh Arunachal Pradesh by-election result

0
905
views

Goa Assembly-a by-election neihah BJP-in seat ruak pahnih a la a, state CM, Manohar Parrikar-a chuan an beisei angin thil a thleng niin a sawi a, hei hi BJP sorkar rintlak zia tilangtu niin a sawi. Kar hmasa Nilaini khan state Assenbly-a seat ruak pahnih- Panaji leh Valpoi hnawhkhah nan by-election a ni a, Panaji bial inthlanah hian Pu Parrikar-a chuan vote 9,862 hmuin, Congress candidate, Girish Chodankar-a chu vote 4,808-in a hneh a, Valpoi inthlana chak, BJP candidate leh Health Minister, Vishwajit Rane-a chuan amah el phaktu hnai ber, Congress candidate, Roy Naik-a chu vote 10,066 zetin a hneh a ni. Goa Assembly-a BJP-in seat pahnih an lak avang hian party chuan House-ah hian member 14 an nei tawh a, Congress erawh member pahnihin an la pha lo a ni. Pu Parrikar-a hi Panaji bialtu atana thlan tlin a nih tak avang hian Rajya Sabha MP a nihna atanga a ban a ngai dawn a, kar lehah banna a theh lut dawn niin a sawi a, CM hi Rajya Sabha-ah Uttar Pradesh aiawhin a ding mek a ni.

Delhi Assembly seat ruak- Bawana hnawhkhahna atana kar kalta Nilaini veka by-election neih result pawh vawiin khan puan nghal a ni a, vote 59,886 hmutu, Delhi-a rorel lai pawl, Aam Aadmi Party candidate, Ram Chander-a chu a chak chiang hle. Inthlanah hian BJP candidate, Ved Prakash-a chuan vote 35,834 hmuin pahnihna a ni a, Congress candidate, Surendra Kumar-a chuan a tir lamah khan a elpui dangte aiin vote hmu tam zawk mah se, a vai chawh rualin vote 31,919 a hmuh avangin pathumna a hauh phah ta a ni. Delhi-a bial awm zawng zawng zingah Bawana hian vote thlaktu a ngah ber a, mi 2,94,000 vel an awm a, by-election-ah hian candidate 8 an tel a ni.

Andhra Pradesh-a Nandyal by-election neihah state CM, N Chandrababu Naidu-a kaihhruai, Telugu Desam Party chuan vote tla zawng zawng zaa 50 hmuin hnehna a chang a, TDP candidate, Bhuma Brahmananda Reddy chuan eptu pawl, Yuvajana Shramika Rythu Congress Party candidate, Shilpa Mohan Reddy chu vote 27,000-in a hneh a ni. Kumin March thlaa nandyal bialtu hlui, Bhuma Nagi Reddy-a a thih vangin seat ruak hnawhkhahna atan by-election neih a ni a, Pu BN Reddy-a hian nikum khan a party, YSR Congress chhuahsanin, TDP-a zawm a, hei vang hian party pahnih inkarah hian inelna boruak a san phah hle a ni.