Govt. Mizo Higher Secondary School-ah National Deworming Day hmang

0
736
views

Ramchhung hmun dang rualin Mizoramah pawh vawiin khan rulhut damdawi ei runpui ni, National Deworming Day hman a ni. Aizawlah chuan Health Department bul tumin Zarkawt-a Govt. Mizo Higher Secondary School-ah he ni hi hman a ni. A hmanpuitu Health Minister Pu Lal Thanzara chuan kum 2015 atang khan National Deworming Day hi rampumah hman tan a ni tih sawiin, zirlai naupang leh school kai lo kum 1-19 inkarte chu a thlawnin rulhut hlo ei tir vek tur an ni tih a sawi a, Mizoramah pawh he ni hi nikum February atang khan hman tan a ni tih sawiin naupang za zela 96 hnenah rulhut damdawi pek niin a sawi bawk. Pu Lal Thanzara chuan rulhut pai lo tura kut silfai thatte, thlai leh thei ei tur silfai thatte, tui thianghlim in te, ekin tha leh thianghlim tak a inthiarte, ei tur khuh thatte leh in leh a vel vawn fai ching turin zirlaite chu a fuih a ni. National Deworming Day hi kum 1 ah vawi 2 hman thin a ni a, zirna in hrang hrang leh Anganwadi Centre ah te a thlawnin rulhut damdawi sem a eitir thin a ni. National Centre for Disease Control in a zirchian danin Mizoramah rulhut pai thei dinhmuna ding naupang za zela 51 an awm a ni. Lawngtlai-ah chuan tukin zing kar khan Central YLA Playground-ah National Deworming Day hi hawn a ni a, he inkhawm a tel Sikul naupangte hnenah rulhut damdawi ei tir an ni. National Deworming Day hawnna inkhawmah hi Chief Medical Officer Dr.Thani Pachuau in a kaihruai a, Addl DC Pu H.Dolianbuaia thu sawiin hriselna ngaih pawimawh a tul thute, rulhut in mihring hriselna a tih chhiat dante sawiin he ni hman hian naupangte tan hriselna lamah kawngro thui tak a su dawn niin a sawi a ni. Vawiina hmun hrang hranga he ni hmanna-ah School hrang hrang leh Anganwadi Centre -ah te rulhut damdawi sem a ni. National Deworming day hi District hrang hrangah pawh hman a ni a, sorkar School leh Private School-ah te pawh zirlai naupangte ei turin rulhut damdawi sem a ni.