Gujarat inthlan boruak sang, Congress leh Pakistan a ruka inkawmah PM-in puh

0
548
views

Gujarat Assembly inthlan boruak a sang ta hle a, PM, Narendra Modi chuan Congress party leh Pakistan hruaitute chu a ruka inkawmah a puh a, Pakistan High Commissioner leh Foreign Minister chuan PM hlui, Manmohan Singh leh Vice President hlui, Hamid Ansari te nen darkar thum chuang an inkawm niin a sawi. He puhna hi Congress chuan thu dik lo niin a sawi a, he intawh khawmna hi a ruka neih a nih loh thu leh, politics leh sorkar mi challang tak tak, khatih hun laia mi pawimawh-te leh media mite, sipai hotute pawh an tel ve niin an sawi a, Pu Modi hi thudik kaihlek tumah an puh a ni. Congress Vice President, Rahul Gandhi chuan Gujarat inthlana Japan, Pakistan leh Afghanistan sawi chhuah fo chu a \ulna a hriat loh thu leh Gujarat-a inthlurbing turin PM chu a duh thu a sawi. Puan tawh angin Gujarat inthlana vote thlak thawh khatna chu Inrinni khan neih a lo ni tawh a, a thawh hnihna tun kar Ningani, ni 14 hian neih tur a ni a, bial 93-ah inthlan a ni ang a, hemi inpuahchahna atana Ahmedabad khawpuia khawlaia inkhawm koh chu police-te’n muanna tibuai thei a nih avangin an khap a ni. Vote thlak thawh khatna-ah khan bial 89-ah inthlan a ni a, vote nei zawng zawng za zela 66.75 velin vote an thlak nia hriat a ni. Puan tawh angin, Gujarat-ah hian BJP an sorkar rei tawh hle a, Congress an chak hnuhnun ber chu kum 1994 inthlanah khan a ni a, hei pawh hi a kum leh, kum 1995 khan \hiah zui a ni.