Himachal Pradesh-a rorel lai, Congress chhungkuaah harsatna thleng

Himachal Pradesh-a rorel lai, Congress chhungkuaah harsatna nasa tak a thleng mek a, an party MLA 36 zinga 27-in state CM, Virbhadra Singh-a an thlawp thu an sawi a, CM leh state Congress President, Sukhvinder Singh Sukhu hi an inngeih lo hle a ni. Kum 83 mi, Virbhadra Singh-a thlawpute chuan an party President, Sonia Gandhi chu an buainaah hian inrawlh turin an ngen a, he state-ah hian kum tawp lamah Assembly inthlan buatsaih a ni dawn a, Pu Virbhadra Singh-a hian chuh a tum loh thu a sawi tawh a ni. CM, Virbhadra Singh hi Delhi-ah a cham mek a, Sonia Gandhi hmuh a, he state-a an party kaihhruaina kawngah thuneihna pumhlum neih dan tur a ngaihtuah dawn nia hriat a ni. Pu Virbhadra Singh-a hi Himachal Pradesh CM, vawi 6 a ni tawh a, kar kal ta khan Pi Gandhi hi lehkha thawnin, state PCC President, Sukhwinder Singh Sukhua thil tih dan hi a sawisel a, PCC President a nihna atanga chawlhtir a nih loh chuan, state Assembly inthlan chuh emaw, buaipui emaw a tum loh thu pawh a hrilh a ni. Virbhadra Singh hian state PCC President atan an hruaitu hlun tak Asha Kumari chu dah a rawt a. Himachal Pradesh Congress chhungkuaa harsatna chungchangah hian Congress thuneitu sang pawh an lungrual lo a, Congress vice-president, Rahul Gandhi, Norway atanga a lo haw hunah thu tlukna siam a nih rin a ni a, state CM hi a thlawp loh rin a ni. Virbhadra Singh hi Himachal Pradesh-a Congress hruaitu langsar leh hlun ber ni mah se, a upat ve tawh avangin tun hma a tluk tawh lo a, tun hnaiah hruaitu naupang zawk an awm nual tawh a, tuna state PCC President pawh hi kum 52 mi a ni. Kum 2012-a state Assembly inthlanah khan he state-a seat awm zawng zawng 68-ah Congress hian 36 an la a, BJP-in 26 an la a, tuna an buai dan en hian thuneihna an chan zui tawh loh mai hlauhthawnna pawh party chhungah a lian hle nia thu dawn a ni.