India-in chhan nei loa Pakistan-in tharum thawha a bei chu na takin a dem.

0
642
views

Pakistan hian kum 2003 inkahhai thuthlung a ni zawna bawhchhiain Jammu and Kashmir-a LoC pelin sipai leh laipuite nen India a beih chhunzawm zel a, Pakistan Air Force te chuan boruaka inremna bawhchhiain India sipaite awmna post te tinzawnin an che bawk a ni. External Affairs Ministry chuan Pakistan Acting High Commissioner chu koin Pakistan chet dan hi na takin an dem thu an hrilh a ni.

India in Pakistan civil mi te emaw sipaite bei lovin, Balakot-a Jaish-e-Mohammed mifirfiakte inkhuarna hmunte a beih hnuah, Pakistan-in thliar hran nei loin civil mi inhum nan-a hmangin, India ram lama chengte a beilet chu New Delhi hian a dem hle a, tharum thawhna laka ram venghim tura chet chu India dikna chanvo a ni a ti. Pakistan hian khawvel ram dangte’n an phut rawn, a rama inkhuar mifirfiakte te lakah hma la lo a, tharum thawh zawnga a che hi pawi a tih thu India hian a sawi a ni.

Pakistanin a thlawhna an kahthlak hnua an man, Wing Commander Abhinandan Varthaman chu Geneva Convention anga humhim anih thu India chuan sawiin him tak leh a rang lama India-a hawtir turin a phut bawk a ni. Kum 1949-a siam Geneva Convention inremna Article 3-na chuan indo vanga mi man te chu thah emaw sawisak emaw hmusit taka enkawl emaw an ni tur a ni lo a ti a, Article 4-na chuan sipai te chu thu zawf fiah-a sawisak a khap a, an hming, an pianni, an rank leh service number bak zawh phal an ni lo a ni. Mithiamte chuan Abhinandan hi International Humanitarian Law-in a hum him bawk tih an sawi a, he dan hnuaiah hian mi mante chu riahna, eitur leh inenkawlna turin damdawite pek tur an ni.
Pakistan Foreign Minister Shah Mahmood Qureshi chuan Pakistan chu pilot thawn haw chungchang sawiho turin a inpeih thu a sawi a, Prime Minister Narendra Modi chuan vawiin hian Cabinet \hutkhawm a ko nghal a ni.