India Indo thlawhna ten Line of Control hrula mifirfiak pawl, Jaish-e-Mohammed inkulhna hmun te tukin khawvar hma khan beiin mifirfiak tam tak an thi.

0
567
views

Masoos Azhar-a kaihhruai Jaish-e-Mohammed mifirfiak pawlte’n Pulwama-ah thihchilh bomb hmanga CRPF sipai 40 an thah hnu, kar 2-naah India chuan tukin dar 3:30 vel khan Indian Air Force te indo thlawhna Mirage 2000, 12 hmangin LoC-a Balakot khua-a mifirfiak te tawmna hmun leh an control room te a bei a, bomb kg 1,000 a rit thlakin mifirfiakte inkulhna hmun hi an ti chhe vek a ni.

Foreign Secreary Vijay Gokhale chuan Jaish-e-Mohammed te hian ram chhung hmun engemawzatah thihchilh bomb hmanga firfiaka chet an tum thu leh he ruahmanna atan hian Fidayeen jihad mi te an train mek an ni tih hriat ruk anih thu a sawi a, India chuan vawi tam tak Pakistan hnenah Jaish-e-Mohammed leh mifirfiak pawl dang inkulhna hmunte ti bo turin a lo ngen tawh a, India ngenna a hlawh chham zel avangin hetianga chet mai loh chu India tan a ram venhimna turin kawng dang a awm lo a ni a ti. Mifirfiakte laka beihpui thlakna hi ruahman ang chiaha kalpui theiin zaa 100-in a hlawhtling a ni.

Prime Minister Narendra Modi chuan New Delhi-ah ram venhim chungchang sawiho turin mipawimawhte a ko khawm nghal a, minister te nen hmalak zel dan tur an sawiho a ni. Air Force chuan ramri leh LoC hrula boruak-a ram venhim hna thawktu air defence system-te chu inral ring reng turin thu a pe a ni.