Indian Film Festival Mizoram tan a ni dawn

0
583
views

Innovation India Advertising & Events Pvt. Ltd. leh Mizoram Sorkar-a Urban Development and Poverty Alleviation Department tangkawp buatsaih Indian Film Festival Mizoram chu naktukah tan a ni dawn ta. A hawnna inkhawm hi naktuk tlai dar 5-ah Aizawl Vanapa Hall-ah neih a ni ang a, Chief Minister, Lal Thanhawla’n a hmanpui ang. Indian Film Festival hi a duh a piang tan chhim theih a ni dawn a, a hawnnaah hian Savdhan India Star, Susanth Singh pawh a tel dawn a ni. Indian Film Festival Mizoram neih tur atan thil pawimawh hrang hrang chu tun thla ni 10 khan UD&PA Minister, Pu Zodintluanga leh Innovation India Managing Director, Captain Rahul Bali-a ten Aizawl Press Club-ah thuthar thehdarhtute an lo hrilhfiah tawh a. Pu Zodintluanga chuan, Indian Film Festival Mizoram buatsaih tura an thawhpui Innovation India chu tun hmaa hlawhtling taka hetiang Programme lo buatsaih tawh thin an nih thu leh tuna Mizorama an buatsaih leh turah pawh beiseina sang tak an neih thu a sawi a. He Film Festival neih turah hian India Film Industry-a mi hlawhtling ber ber te lo kal tura beisei an ni a, Mizorama an cham chhungin hmun hrang hrang fanpui an ni dawn a, nakin zelah Mizoram chu Film channa hmun tha tak a nih theih nan Mizoram mawina pholan tum a nih tur thu a lo sawi tawh a ni. Naktuk atanga tunkar ningani thleng awh tur Indian Film Festival Mizoram-ah hian faina lam hawi inzirtirna chu an thu ken langsar a ni dawn a, Mizorama khaw fai bera thlan Biate khaw chanchin Film insiamsiaknaa a tha zual 3 chu he Film Festival-ah hian chhuah a ni ang. Indian Film Festival Mizoram buatsaih turah hian ZONET leh Vanglaini chanchinbu chu Media Partner an ni.