May ni 3-a Cyclone Fani-in Bengal a pan avangin rel tlan turte hi cancel an ni a, hrilh lawk an nih loh avangin rel chuang tur \henkhat chu thinrimin Barasat-a rel te chu dangin an suasam a, heng zingah hian Gautam Mondal hi police te’n an man ve a, a tukah Dum Dum Central Jail-ah sawn a ni a, hliam engemawzat nei sa anga sawi a ni.
Gautam-a nupui naupailai Satami chuan police te’n an man tih an hriat khan pianphunga rualban lohna a neih thu sawiin rel suasamnaah hian a inrawlh thei loh thu an sawi a, chhuah tura an ngenna chu police te hian an ngaihsak lo tih an sawi, Thawhlehni-a Gautam-a nu Arati-in a tlawh chuan Gautam-a hian police te’n an nghaisak thu leh eitur an pek loh thu a lo hrilh a, a tuk zingah police te chuan an inah kalin a thih thu hi an hrilh a ni.
Arati chuan a fapa pian phunga rualbanlo chu chaw ngheia dahin police te’n an sawisa hlum a ni a ti a, a thihnaa mawhphurtute chu hremna na tak pek a duh thu a sawi a, heng mite man phutin an chhungte leh anmahni \antu tualchhung mipui chuan Lebutala rel station-a rel kalkawng dangin motor ke te an hal a, police te nen innawrin darkar 5 hnuah an hnawt darh thei chauh a ni. Tualchhung mipuite chuan Gautam-a thihdan tak hi chhui an phut a, Central jail superintedent Debashish Chakraborty chuan hma lak mek a nih thu a sawi a, Gautam-a chhungte’n man a nih lai hian hliam a nei lo anga an sawi chu hnialin police te chuan a ke-ah hliam a neih thu leh lung inah doctor te’n an enkawl thu an sawi a, Thawhlehni-a a dinhmun a tlakhniam hnuah damdawi ina hruai a ni tih an sawi thung a ni. Post mortem tihkhawtlai a nih avangin Gautam-a chhungte hian a ruang hi an la dawng lo a ni.
