He bill hi vawiin khan Rajya Sabha-a ngaihtuah turin chhawpchhuah a ni a, Dan dinglai Indian Medical Council Act of 1956 a luahlan dawn a ni.
Doctor te nawrh vang hian India rama healthcare service hrang hrangah harsatna a thleng a, pawn lam a\anga inentir tura kal te, emergency department leh ICU ten harsatna an tawk zual a ni.
He dan thar-a section 45-na-ah National Medical Commission rawtna chu sorkarin a hnawl thei ang tih a chuan avangin Doctor te hian a him lo a ni an ti a, eptu party te pawhin he bill hi mipui rorelna kalphung kalh leh India ram nih phunga state hrang hrangte thawhhona kalphung kalh a ni an ti.
He bill hi sorkar chuan damdawi zirna lam kaihhnawiha thuneihna hmansualna tam tak tih bona tur a ni a ti a, he dan thar hnuaiah hian Medical Council of India chu paihin, National Medical Commission din a ni thung dawn a ni. Dan thar hnuaiah hian NEET PG exam a awm tawh dawn lo a, National Exit Test (NEXT) chu MBBS zirlai ten an chhuah dawn kumah an exam nghal ang a, hemi paltlangte chuan Post Graduate an zir chhunzawm nghal thei tawh dawn a ni. NEXT exam hi rampum huapa buatsaih a ni dawn a, zirlaiten MBBS an pass chhuah hnuah chauh post graduat zir tura exam an hmachhawn leh \hin chu ngai tawh lovin, an zir chhuah rualin Post Graduate an zir zawm theih leh theih loh a chiang nghal thei tawh dawn a ni.
