Electoral Roll dik leh felfai neih a pawimawhzia leh ram hruaitu thlannaa vote thlak a pawimawhzia inhrilhhriatna, ‘Workshop On Clean Election’ tih chu nizan khan Mamit khawpuia Siamliana Hall-ah Mamit Branch MHIP Member te tan buatsaih a ni. He workshop hmanpuitu Mamit Additional DC Pu Jacob Lalawmpuia chuan kumin kum tawp lama Mizoram Assembly inthlanna neih tur atan inbuatsaih lawk a tul thu te, inthlanna felfai leh thianghlim nei tura inpuahchah a tul thu te, mahni aia roreltu tur thlanna a ni tih hre renga therhlo engemaw vanga chanvo leh zahawmna hralh loh tur a ni tih te a tarlang a ni. Pu Jacob Lalawmpuia chuan chhungkhat nu ber te chu dinhmun pawimawh chelhtu an fanaute bakah an pasal thlenga kawng dik kawhhmuh theitu an ni tih hre reng turin a fuih bawk a ni. He inkhawmah hian Mamit Election Officer, Pu MH James pawhin thu a sawi a ni. He Workshop hi Mamit Branch MHIP Adviser, Pi F. Chhungliani’n a kaihruai a ni.
