Manipur CM hlui, Rishang Keishing-a chu kum 96 mi niin a thi

0
884
views

Manipur CM hlui leh Congress hruaitu hlun, Rishang Keishing-a chu nizan khan Imphal-ah a boral a, a pian kum hi sawi dan a inan loh avangin kum 96 nia sawi an awm a, kum 98 nia sawi an awm bawk. Pu Keishing-a hi thla hlui ni 1 khan Regional Institute of Medical Sciences damdawi inah dah a ni a, RIMS doctor-te chuan a taksa peng hrang hrangin hna a thawh theih tawh loh avangin nizan dar 8:15 vel khan a thi tih an puang a ni. Rishang Keishing hi kum 1980-88 leh 1994-1997 ah khan tum li Manipur CM a ni a, Manipur CM ni rei ber a ni. Ram zalenna sualtute zinga a tel hnuah kum 1952-a Parliament hmasa berah khan Lok Sabha member atan thlan tlin a ni a, Rajya Sabha MP pawh kum 2014 thleng khan a ni bawk a, MP a nih tawp lamah phei kha chuan khawvela Parliament member upa ber a ni. Congress party-a mi rinawm tak a ni a, kum 2001-ah khan Manipur-a Congress MLA 14 zinga 13-in an party an chhuahsan pawhin amah chauhin eptu lamah a thu a, Congress sorkar a tlak hnuah Assembly thiah a ni a, inthlan buatsaih lehah pawh thuneihna an chang leh tho a ni. Pu Rishang Keishing-a ruang hi damdawi in atanga Imphal khawpui daifema a ina lak a nih hnuah vawiin khan Manipur Congress office-ah zalh a ni a, naktukah Kamjong subdivision-a an khuaah phum a ni ang. Manipur CM, Biren Singh-a chuan Pu Keishing-a chu an state mi chhuanawm leh entawntlak a nih thu sawiin, a ui thu a sawi a, Union Home Minister, Rajnath Singh-a pawhin Pu Keishing-a hi a ui thu leh Manipur hruaitu pawimawh leh langsar tak a nih thu a sawi a, Union Minister of State for Home, Kiren Rijiju-a chuan Pu Keishing-a hi kum za thelh a nih hnuah pawh a viak a la tha hle tih sawiin a ui thu a sawi a ni. Manipur Larsap, Najma Heptulla leh Congress Vice President, Rahul Gandhi pawhin Pu Keishing-a hi an ui thu an sawi bawk. Pu Keishing-a hi state sorkarin ni thum chhung a sun dawn a, vawiin khan state puma sorkar pisa leh zirna in zawng zawng khar a ni.