Marshall of the Air Force Arjan Singh-a chu lungphu chawlin New Delhi-ah a thi

0
939
views

India rama thlawhna sipai ropui bera ngaih, Marshall of the Air Force Arjan Singh-a chu lungphu chawlin New Delhi-ah a thi a, kum 98 mi a ni. India thlawhna sipaite zinga Marshall of the Air Force awm chhun, Arjan Singh-a hi kum 45 mi chauh a nih laiin thlawhna sipai lalber a ni a, kum 50 a nihin a pension a, a hnuah Switzerland, Vatican leh Kenya ramah India ram palai a ni leh a, Delhi Larsap a ni tawh bawk. Arjan Singh hi vawiin khan ropui taka vui a ni a, amah sun nan hian Delhi-ah chuan hnam puanzar pawh a ngul chanve-ah zar a ni a, a in a\anga a vuina hmun thleng, km 8 vel chu laipui tawlailira phurh a nih hnuah, Air Force band, khawmual, lawng leh thlawhna sipaite’n an thlah liam a, vui a nih lai hian, Sukhoi-30 indo thlawhnaten thlahna chibai an buk a, laipui vawi 17 kah a ni bawk. Marshall of the Air Force Arjan Singh-a vuina-ah hian sipai hotu ni mek leh chawl tawhte pawh an tel kim hle a, Defence Minister, Nirmala Sitharaman, PM hlui, Manmohan Singh leh BJP hruaitu, LK Advani te pawh an tel a ni.

Arjan Singh hi indopui pakhatna tawp hnu lawk, kum 1919, April ni 16 khan Punjab-ah a piang a, kum 1938 khan UK-ah Royal Air Force College-ah a lut a, kum 1943 a\ang khan No 1 Squadrom Leader atan ruat a ni. Kum 1944-a Japan-in Burma an lak khan ral bei tura tirh an ni a, a hnathawh \hat avangin Kumpinu chawimawina, Distinguished Flying Cross hlan a ni a, kum 1965-a India leh Pakistan indonaa a hnathawh \hat avangin civil mite chawimawina sang, Padma Vibhushan chu hlan a ni leh bawk. Marshall of the Air Force hi khawmual sipaia Field Marshall tlukpui, Five Star General dinhmun a ni a, ram tana a thawh ropui em avangin kum 2002 khan hlan a ni