US, Maryland-a inkahna thlengah mi 3 an thi a, mi dang 2 an hliam a, pawi khawihtu hi police ten an man tawh tih an sawi. Pawi khawihtu hi kum 37 mi, Radee Labeeb Prince niin Harford County Sheriff, Jeffrey Gahler chuan a sawi a, Police-te chuan Edgewood-a park pakhatah, Advanced Granite Solutions company hnathawk panga chu tualchhung sana-a nimin zing dar 9 velah khan mi pakhatin a kap tih thu an dawn bawhzuiin, Park hi an pan a, hliamte an bawihsawm laiin, mi pakhat, car-a tlanchhia chu man tumin an um zui a, an mi zawn hi darkar hnih vel an hloh hnuah, state ramri hrang hrangah police te chu inralring tura hriattir an ni a, nizan dar 7:30 velah khan Delware-ah man a ni ta niin an sawi.
Thuneitute chuan Prince-a hian a mi thahte hi a hriat sa vek an ni a, a thawhpuite ni hialin an sawi. A tlanchhiatna lamah hian a thurualpui mi pakhat chu a lu leh taksa-ah a kap tih an sawi bawk a, a thurualpui pa hi damdawi ina enkawl mek a nih thu leh a dam chhuah an beisei thu an sawi bawk a ni. Police-te chuan Prince-a hi tun hma pawhin a hnathawhna hmuna tharum a thawh avangin thubuai siamsak a lo ni tawh tih an sawi a, a thawhna \hin company, JPS Marble and Granite hotupa pawhin mi dang kut a thlak avanga a lo ban tawh thu leh, insawifiah tuma vawi thum lai a hmuh nawn thu te, a nunna atana hlauhawma a hriat avangin a hnaiha awm phal lo turin court-ah a pawh a lo zualko tawh tih a sawi a ni.
