Central Pool atanga Mizoramin Medical Course zirna tur seat a chan zat tihtlem a nih chungchang chu nimin khan Mizoram MP pahnihin sorkar laipui hotute an sawipui. Lok Sabha member, Pu CL. Ruala leh Rajya Sabha member, Pu Ronald Sapa Tlau hian Union Health Minister, Pu Jaggat Nadda hmuh an tum a, Himachal Pradesh-ah a zin hlan a nih avangin Union Health Ministry-a Joint Secretary, Pu Arun Singhal chu thil awm dan an sawipui a. Pu Arun Singhal chuan, Central Pool atanga Medical Course zir tura state hrang hrang seat pek dan chu tun hma lamah mumal lo taka tih a nih avangin state-ten rualkhai zawka an chan theih dan turah rawtna thar a awm a, seat sem dan hi state-a mihring awm zat a zir zela siam rem a ni tih sawiin, mihring nuai khat zelah seat 2.5 pek a nih avangin Mizoramin seat a chan zat chu a tlem phah ta niin a lo hrilh a ni. Hemi chungchang buaipui tura nimina New Delhi-a kal, Higher and Technical Education Minister, Pu R. Romawia leh Secretary, Pu Benjamin-a pawhin Union Health Minister, Pu Jaggat Nadda chu a zin bo avanga an hmuh thei rih loh avangin Union Health Ministry-a Joint Secretary, Pu Arun Singhal hi hmuh an tum a, an thu ngaihchan mek a ni. Puan tawh angin, Central Pool atanga kumina Mizoramin Medical Course zirna seat a chan zat hi nikum aiin 8-in a tlem a, Union Health Ministry-in Central Pool atanga Mizoramin Medical seat a chan zat tur, Zirtawpni kal taa a tihchhuahah chuan, Mizoram tan hian MBBS-ah seat 17 leh BDS-ah seat 3, a vaiin seat 20 dah a ni a. MBBS-ah hian nikum khan Mizoramin Central Pool atangin seat 25 a chang a, kuminah hian 8-in a tlem ta zawk a ni. MBBS leh BDS zir tura Mizoramin Central Pool atanga seat 20 a hmuh bakah hian North Eastern Council (NEC) hnuaiah seat 11 a chang a ni.
