Meghalaya CM-in BJP dem, mipuite fimkhur turin chah

0
818
views

Environment kaihhnawih thubuai ngaihtuahtu leh thuneitu pawl, National Green Tribunal-in Meghalaya-a lungalhthei laih chhuah a khap chungchanga state sorkarin rawtna a siam chu bawhzui a la nih loh avangin state CM, Mukul Sangma-a chuan nimin khan BJP kaihhruai NDA sorkar a dem a, state mipuite chu hemi chungchanga BJP hruaituten an campaign-naa thu dik lo an theh darh mek lakah fimkhur turin a chah nghal a ni. State sorkar chuan ram danpui hnuaia lungalhthei chungchanga dan ding lai, Coal Mines Nationalisation Act, 1973 leh MMDR Act 1957 hmanga NGT-in he state-a lungalhthei laih chhuah a khapna chu President hriatpuinaa hlih a nih theih nan sorkar laipui hnenah rawtna a siam a, sorkar laipui chuan hemi chungchang ngaihtuah tur hian Committee a din tawh a, amaherawhchu awmze neia bawhzui a la ni lo a ni. BJP hruaitute chuan nakkum state Assembly inthlannaah thlan tlin an nih chuan, NGT-in he state-a lungalhthei laih chhuah a khap chungchanga buaina pawh hi thla ruk a\anga thla 9 inkar chhung chin fel nghal an tiam a, CM erawh chuan BJP chu thu dik lo hmanga campaign-ah leh state sorkar rawtna chu tihkhawtlai tumah a puh a ni.