Mexico City-a lirnghing tuarte zawng chhunzawm zel

0
343
views

Thawhlehni t<ka Mexico City-a lirnghing rapthlak tak tuarte chu zawn chhunzawm zel an ni a, nungdama chhanchhuah theih zawngin chhun zan zawma dap mek a ni. Mexico City-a sikul pakhat chim hnuaiah zirlai, chhanchhuah tur an la awm nia hriat a ni a, hmeichhe naupang pakhat, kum 13 mi chu dawhkan hnuaiah a tawm avangin a him nia hriat a ni. He sikul chimah hian zirlai 21 leh zirtirtu 5 an thi a, chin hriat loh engemawzat an la awm bawk a, he sikul hi he lirnghingin a sawi chim, in engemawzat zinga mi a ni a, tun thlenga hriat chian tawh chinah chuan mitthi hi 230 niin BBC chuan a sawi. President Enrique Peña Nieto chuan thite hi ni thum chhung sun an nih tur thu a puang a ni. Mexico City chhim lam, Coapa district-a Enrique Rébsamen primary school hi tuna ngaihven hlawh deuh ber chu a ni a, nu leh pa tam takin an fate chanchin ngaihvenin he sikul hi an pan hlawm a, khawl hmanga an hriat danin, concrete chhuat chim karah nungdam an la awm ni ngeia hriat a ni a, an thil thawn luhte pawh chhangtu an awm nia hriat a ni. He sikul chimna hmunah hian sipai leh Police telin mi 1,000 velin nung dama chhanchhuah tur hi an dap a, nizan thleng khan nungdamin mi 52 an chhanchhuak tawh a ni. Mexico City Mayor, Miguel Angel Mancera chuan he khawpuiah hian in 39 a chim niin a sawi a, hmun hrang hrang pawh a kim thei ang bera dap niin a sawi. Puan tawh angin, Mexico sawitu lirnghing hi richter scale-ah 7-1 a ni a, a sulhnu hi a rapthlak hle a ni.