MIMER-a Doctor zirlai, Students’ Union-in MIMER hming, Zoram Medical College tia thlak chu zirlaite bakah college hna kaltluang lai tan buaina leh harsatna tam tak thlen thei a ni tih sawiin, an duh loh thu an sawi a, ngaihtuah \ha leh turin Mizoram sorkar an ngen.

0
666
views

Doctor zirlai te hian April ni 22-a Council of Ministers \hukhawmin Mizoram Institute of Medical Education and Research (MIMER) tih, Zoram Medical College tia thlak an rel chu an duh lo tih an sawi a, college hming thlak chu a \ulna chhan \ha tak hriattir an la nih loh avangin thlak anih loh nan a \ul ang anga hmalak an tum tih MIMER-a MBBS zirlaite hian vawiin khan thuchhuah siamin an sawi.

MIMER hming thlak lo tura ngenna hi zirlaite hian Chief Minister hnenah May ni 7 khan an lo thehlut tawh a, an lehkha thehluhah hian kar khat chhunga hmalakna an hmu lo anih chuan hming thlak an duh loh thu hi media-a puanzar an tum thu an lo hriattir lawk tawh a ni.

May ni 7-a Chief Minister hnena an lehkha thehluhah hian MIMER hming, Zoram Medical College tia thlak vanga harsatna thleng thei te an tarlang a, chutah chuan MIMER hian nikum 2018 khan MCI atanga college bul \an phalna Letter Of Permission (LOP) a hmuh thu te, kumin May ni 3 khan first renewal pe tura MIMER hi an endik leh tawh thu te, Registration dil \an anih a\anga college din phalna, Letter of Permission (LOP) hmuh anih thlengin lehkha pawimawh chi hrang hrang MIMER hming veka MCI-ah thehluh a lo nih tawh thu te, college din phalna renew leh tura dilna thehluh endiktu, 1st Inspection team-te hnenah pawh lehkhapawimawh zawng zawng MIMER hminga thehluh vek anih tawh thu te leh hetah hian Document, College Seal leh Letter Head zawng zawng te pawh MIMER hminga thehluh vek tawh anih thu te tarlangin MCI record-ah College hming thara siam\hat leh chu thil tih theih a ni tawh dawn lo a ni an ti.

MBBS zirlaite hian Medical Council of India in record a kawl zawng zawngah leh Registration buaipuina zawng zawngah MIMER hming chu hman vek a ni tih an sawi a, chung zawng zawng thlak tir leh vek chu thil harsa tak a ni dawn a, Document thenkhata MIMER hming chuang a, \henkhata ZMC tih hman a nih chuan MCI lamin an pawm theih a rinawm lo a ni an ti a, sum duhkhawp hman tur a awm loh vangin tun dinhmunah college chuan MCI mit a la tlung phak lo hle a, buaina dangin a belhchhah leh chuan Registration dilna hi MCI in a lo tih fo tawh angin hnawl mai a ni ang tih a hlauhawm a ni an ti.

Heng bakah hian MBBS zirlaite hian 1st Semester Examination an lo paltlang tawh thu leh 1st Year University Examination an hmabak mek thu sawiin, hengah te hian College hming an in ziahluhna chu MIMER tih a ni tih an sawi a, college hming hi thlak anih chuan zirlaite results chu MCI lamin a pawm a rinawm loh a ni an ti a, zirlaite 1st Year Certificate, Marksheet leh Record te MIMER hminga tih chhuah a nih laia an kum hnihna 2nd Year Certificate atanga College hming dang hman anih leh si chuan nakin zelah, zirlai pass chhuakte pawhin harsatna an la tawk dawn a ni an ti. Heng bakah hian zirlaiten mithir ruang an zai tur an lakluh theihna tura Anatomy Act of Mizoram Assembly in a pass tawhah pawh MIMER tih hi hman a nih avangin College hming hi thlak anih chuan kum khat tal nghah belh leh a ngai dawn niin zirlaite hian an sawi a, Mizoram University hnuaia an in ziahluhna tur Affiliation lehkhapawimawh thui tak lo kal tawhah te pawh MIMER tih chu hman a nih bawk avangin MIMER hming thlak chuan zirlaite leh college tan harsatna tam tak a thlen a ni an ti.

Zirlaiten Chief Minister hnena lehkha an thehluhah hian MIMER hming thlakin a nghawng tur thil chi hrang hrang 10 an ziak a ni.