Mizoram Assembly Budget Session chu March ni 13 atanga tan tur chuan March ni 29 thleng a awh ang

0
775
views

Mizoram Assembly Budget Session chu March ni 13 atanga tan tur chuan March ni 29 thleng a awh ang a, kum 2018-2019 budget chu March ni 15-ah pharh a ni ang. He sesion programme kimchang hi vawiin khan Business Advisory Committee Speaker, Pu Hipheia hova thukhawmin an duang a, session tan ni hian tihdan pangngaiin House-ah Larsap, Lt. Gen. Nirbhay Sharma-an thu a sawi dawn a ni. Hemi hnu ni 14-ah MLA hlui, Pu Lalchunga Chinzah, January ni 28-a thi ta sunna neih a ni ang a, hemi ni vek hian House-a Larsap thusawi sawihona neih zui a ni ang. Budget a tlangpuia sawihona hi March ni 19 leh ni 20-ah neih a ni ang a, ni 21 atangin Minister hrang hrangte hna chanpual enkawlna tura sum ruahman chu sawi tan a ni ang a, budget pumpui hi March ni 29-ah pass hman tum a ni ang. Vawiina BAC thutkhawmnaah hian a kaihruaitu Speaker, Pu Hiphei bakah Parliamentary Affairs Minister, Pu R. Romawia, Deputy Speaker, Pu R. Lalrinawma, Pu K. Sangthuama MLA leh Pu PC Zoramsangliana MLA te an tel a ni. ZONET thudawn danin he session-a ngaihtuah turin sorkar Bill emaw, Private Members Resolution emaw, zawhna leh thildang lut vawiin thlengin a la awm lo a ni.