Mizoram Premier League Season 6 hawng

0
458
views

Mizoram Football Association leh Zonet tangkawp buatsaih, Mizoram Premier League Season 6-na chu nizan khan Reliance Sports General Manager, Pu Chirag Tanna-a’n a hawng a. Aizawl Chanmari YMA Hall-a MPL Season 6-na hawnna inkhawmah hian MFA President, Pu Lal Thanzara’n MPL buatsaihna atana Zonet-in kum tin cheng nuai 25 a pek thin chu nuai 30-ah tihsan a nih tak avangin MPL Club-te pawisa dawn tur zat pawh a pun phah dawn niin a sawi a. MPL chu mipuiin zau zawk an thlir theih dan tur pawh ruahman chhoh zel a ni a, Season 5-na khelh a nih lai khan Champhai Chhangphut Field-ah hlawhtling taka khelh a lo ni tawh a, kuminah pawh hian Lungleia Thuamluaia Mualah MPL hi khelh leh tum a ni a, Kolasib leh Serchhip-a phullem phak mek pawh zawh a nih hunah MPL hi khelh tum a nih thu a sawi. MPL Season 6-na hawnna inkhawmah hian MFA Executive Committee Member, Referee Committee Vice Chairman ni bawk Pu Laldawngliana kaihhruaina hnuaiah Team Captain theuhin mawi leh rinawm tak khel turin thu an tiam rual a, MPL Handbook leh Registration Booklet tlangzarh a nih bakah Club tinte Jersey hak tur pho chhuah a ni.

MPL season thar hawnna inkhawmah hian TBC Zaithanpuia, Zorinzuali Khiangte leh Feli Fanai
an zai a, Feli Fanai Music Video thar – “Pheichheh mawi i khai ang aw” tih tlangzarh a nih bakah MPL Official Photographer, Pu PC Lala leh MFA Programme-a zai thin TBC Zaithanpuia chu chawimawina hlan an ni bawk. MPL Season 6-naah hian Team 8 an tel dawn a, chungte chu – Aizawl FC, Bethlehem Vengthlang FC, Chanmari FC, Chanmari West FC, Chhinga Veng FC, Dinthar FC, Mizoram Police FC leh Ramhlun North FC-te an ni a, tun thla ni 31 atanga khel tanin, December ni 8-ah zawh fel a ni ang. Mizoram Premier League hi kum 2012 atang khan MFA leh Zonet tangkawp huaihawta buatsaih tan a ni a, MPL buatsaihna atan hian kum tin Zonet-in cheng nuai 25 a tum ziah a, kumina MPL Season 5-na, Champhai Chhangphut Field-a khelh a nih tum khan MFA leh Zonet-in inremna thar an siamah Zonet chuan tanpuina cheng nuai 30 a pe tawh dawn a ni.

RELATED: MPL 6 Kick-Off Album