Mizoram sorkar aiawhte leh HPC(D) hel pawl hruaitute inbe chhunzawm dawn

0
802
views

Remna kawng zawnga Mizoram sorkar aiawhte leh HPC(D) hel pawl hruaitute inbiakna chu naktukah Chaltlanga State Guest House-ah chhunzawm a ni dawn. Sorkar lam atanga ZONET thudawn danin Official Level-a inbiakna nikum September ni 22-a zawhfel a nih tawh avangin tun tuma inbiakna hi chu thuneihna sang zawk nei, Political Level-ah an inbe tawh dawn a, hetah hian sorkar lam chu Chief Minister Political Adviser, Pu Lalrinmawia Ralte leh Pu John Siamkunga MLA, Mizoram Law Commission Chairman ni bawk ten an ho ang a, sorkar officer tel tur te chu Planning Secretary, Dr. C. Vanlalramsanga, Additional Home Secretary, Pu Lalbiakzama leh sorkar officer dang 6 an tel dawn a ni. HPC(D) aiawhte chu an Working Chairman, Pu LT Hmarin a ho ang a, midangte chu Pu Lalthalien, Dr. John Pulamte, Pu Lalthlamuana Hmar leh midang 6 an ni ang. Inbiakna hi naktuk chawhma dar 11 velah State Guest House Conference Hall-ah neih a ni ang a, heta tan hian ruahmanna engkim peihfel a ni tawh a ni. Inbiakna hmasa ber kum 2016, August ni 10-a tan chu tluang taka a kal chhoh avangin hemi hnu hian tum 4 inbiak leh tawh a ni a, hengah te hian HPC(D) thil phut leh sorkar pek theih chin te sawihovin remna siama inbiakna hmawr bawk dan tur thlengin sawiho a ni tawh a, chung zingah chuan Sinlung Hills Council siam rawtna te, HPC(D) hel pawl nunphung pangngaia lo let lehna tura Memorandum of Settlement siam dan tur te, HPC Area tia hriata remna leh muanna boruak tha a awm zui zel theihna tura ruahmanna siam te a tel a ni.