Mizoram State Museum bultumin Museum Week chu vawiin atang khan hman tan a ni. Museum Week hi kum 2004 atang khan kumtin February chawlhkar tawp berah hman thin a ni a, hetih chhung hian Museum chu a duh a piangin a thlawna an tlawh theih tur a hawn a ni. Mac Donald Hill-a Mizoram State Museum-a he hapta hawnna pual inkhawm tawi neihah zirna in hrang hrang hranga zirlai te, School Education, Higher & Technical Education Department leh Aizawl North Treasury-a thawktute leh Zuangtuia Thutak Nunpuitu Team naupangte an tel a ni. Sorkar kum liamta 2016-17chhung khan Mizoram State Museum hi mi 10,147-in an tlawh a, a en man atangin sorkarah Rs. 64,000 an chhunglut a, Sorkar kum mek chhungin mi 3,068-in an tlawh tawh a, chung zinga mi 19 chu ram dang mi niin, mi 51 chu State pawn atang lo kal an ni. Mizoram State Museum-ah hian thil hlui chi hrang hrang 3757 a awm a ni. Museum Week hi tunkar tawp thleng hman tur niin, he hapta hman a nih chhuang hian nitin chawhma dar 10 atanga tlai dar 4 thleng a duh a piang tan Museum hi a thlawna en theih a ni dawn a, Mizoram State Museum chuan hemi chhung hian mipuite chu Museum tlawh theuh turin a sawm a ni.
