MJA General Hqs. in Mizoram chanchinbumite nasa taka kutthlaktu, Assam Police te chet dan chu na takin an dem, a tawp thlenga hmalak rel

0
742
views

MJA General Hqs. in Mizoram chanchinbumite nasa taka kutthlaktu, Assam Police te chet dan chu na takin an dem a, Assam Police te chet dan finfiahna thlalak leh video te chu Prime Minister, The Press Council of India, Home Ministry, DoNER Minister, Assam Chief Minister, Women’s Commission, Mizoram Chief Minister leh mipawimawh dangte hnenah thawna, chanchinbumite dikna hai lan a nih hma chu a tawp thlenga hmalak a rel.

Zophai-a Assam Police leh Mizo Zirlai Pawl inep chanchin ngaihvena kal, Mizo chanchinbumi zinga 7 ten Assam Police kut an tawrh chungchang ngaihtuah hian MJA chuan vawiin khan \ul tawpkhawkah chauh an tih \hin, General Body Meeting a ko a, Assam Police te chet dan chu na taka demin, Journalist te chu news zawnga khawi kipah pawh kal \hin an nih laiin, anmahni venghimtu tur police ten Mizoram chanchinbumite kut an thlak chu na an ti tak zet tih an sawi a. Hmeichhia leh zel pawh kut an thlak duh chu rapthlak an tih thu sawiin an chet dan chuan Assam Police te nunrawnzia a lantir chiang hle a ni an ti. MJA General Body Meeting hian Assam sorkar chu Mizoram chanchinbumi kutthlaktute hi zawng chhuaka man ngei tur leh, an phu tawk hremna pe ngei turin an phut a, an bungrua an tihchhiatsak man hu pawh rul tur leh an inenkawlna senso tumsak turin an phut bawk. Assam Police kut tuar Mizo journalist te hian FIR an thehlut vek tawh a, damdawi thiamte pawhin a tul angin an enfiah tawh a. A thente hi damdawi hmanga enkawl an la ni mek bawk. MJA General Headquarters chuan a theihna apiangah a tawp thlengin hemi chungchang hi a bawhzui zel dawn a tih an sawi a, Mizoram Journalist te chunga Assam Police te chet dan duh lohna lantir nan MJA Gen. Hqrs Member te chuan naktuk chhun dar 12 ah Vanapa Hall tualah lungawi lohna lantirna neih a rel bawk. Mizoram Journalist ten March ni 8 a Assam Police te kut an tawrh a\anga ni 4 liam tawh hnuah pawh Mizoram Sorkar a\anga Journalist te thlavang hauhna leh thlamuanna thu hriat tur awm lo chu MJA Gen. Hqrs chuan khawharthlak an tih thu an tarlang tel bawk.

Bairabi Zophai hmuna thil awmdan a hmuna enfiah tura thawk chhuak, Mizoram chanchinbumite zingah hmeichhe pahnih tiamin mi 7 in Assam Police te kut an tuar a,

Assam Police ten Inrinni-a silaia an kahna leh an insaseng tur umzuia tianga an pawng vuakna ah Aizawl leh Kolasib a\anga thawkchhuak chanchinbumite na taka vuak hliam an ni a, chanchinbumite hian press card an ken te hmuh-a, press mi an nih thu an au chhuahpui chungin Assam police te hian an vaw lui a ni. Chanchinbumi hliam tuarte zingah hian hmeichhe pahnih, AIR Correspondent C Lalthansangi (Nute-i) leh News 18 State Bureau Chief Embassy Lawbei te pawh an tel a, an taksa hmun tam takah nasa taka duk khawpa vuak an tuar ve ve a ni. Ani pahnih bakah hian Aizawl a\anga thawk chhuak Vanglaini Reporter Malsawmdawngzela Hrahsel, Zonet Reporter Joseph Lalnuntluanga leh The Aizawl Post News Editor Zohmingmawia (Te-a) te pawhin na taka vuak hliam an tuar bawk. Anni bakah hian
Kolasib District MJA member pathum in Assam Police te kut hi an tuar a, heng mite hi Kolasib Damdawiin ah hruaia endik an ni a, Kolasib Police Station ah FIR an thehlut nghal bawk.

Kolasib Dist MJA member Assam Police kut tuar, Zing\ian Editor Zomuanpuia chu a ban leh a hnungzang vel bakah a chawn leh malpuiah te na taka vuak hliam a ni a, a camera an vuak chhiat sak bakah a bike pawh Assam Police te hian an vaw chhe nual a ni. Hliam tuar dang Duhlai News Editor R Lalnunmawia chu a ke leh a hnungzang te bakah a taksa hmun sarihah vuak hliam a ni a, DDK Stringer H Vanlalnghaka chu a khel leh nakah te vuak a ni bawk. Kolasib District MJA hian \hutkhawm hmanhmawh ko nghalin Assam Police te chet dan chu na takin an dem a, a \ul anga hma la tur leh zangnadawmna pek an nih theihna tura hma la turin Kolasib Police Station ah FIR an thehlut a ni.