MNF Party-in furpui Campaign a buatsaih chu tukin khan Aizawl khawpui chhung leh Sairang leh Sihphirah chhunzawm a ni a, Sairang Dawrkawna inkhawm buatsaihah MNF General Secretary, Pu Lalruatkima MLA chuan, Mizoram pumah inkalpawhna kawngpui a chhe hle a, hemi avang hian mipui pawhin harsatna an tawk nasa tawh hle niin a sawi a, kawng chhia en tura Health Minister a feh chhuak hlauh chu thil inhmeh lo tak nia sawiin, Congress sorkarin PWD Minister a nei lo em ni tih a zawt a ni. Pu Lalruatkima chuan, Congress-in NLUP chu Pathian programme niin sawi thin mah se, an hlawhchhampui tho niin a sawi a, mipui pawhin an ring tawh lo nia sawiin, NLUP atan cheng vaibelchhe sangthum chuang an seng tawh chungin hmasawnna hmuh tur a awm lova, CAG pawhin a hlawhchhamzia a tarlang zui bawk niin a sawi a ni.
Bethlehem Vengthlanga thusawitu, Pu Lalrinawma, MLA chuan, Aizawl Traffic Jam tihziaawm nana a en chhinna atana school naupangte hman nia sawiin, naupangah nghawng tha lo a thlen phah bakah, naupang pum tha lo an pung nasa hle niin a sawi a, a tira an sawi anga naupangte tana chawhnu lama thil zirna buatsaih a nih leh bawk si loh avangin school ban hnua naupang tih tur hre lo teihawi an tam phah hle nia sawiin, hei hian nghawng tha lo a thlen a hlauhthawn thu a sawi a, an party-in thuneihna a chan hunah an ennawn tur thu a sawi bawk. MNF furpui Campaign hi Durtlang Leitan, Zarkawt, New Market, Bethlehem Vengthlang, Sikulpuikawn, Bungkawn, Dinthar leh Ramhlun South-ah te neih a ni a, heng hmunah te hian an party hotuten thu an sawi a ni.
