Mumbai-ah eptu pawl hrang hrang te’n nimin khan BJP sorkar duh loh lantirna leh ram danpui humhim an duh lantirnan ngawi rengin kawng an zawh. He kawngzawh-ah hian state Congress hruaitu, Ashok Chavan bakah, Nationalist Congress Party hruaitu, Sharad Pawar te, Trinamool Congress hruaitu Dinesh Tripathi te, Sharad Yadav-a kaihhruai Janata Dal-United hruaitute leh CPIM leh National Conference leh Patidar party thar dintu, Hardik Patel leh tualchhung party hruaitute an tel thahnem hle a, kawng an zawh hma hian Maharashtra Assembly eptu pawl hruaitu, Radhakrishna Vikhe Patil-a chenna inah an inhmukhawm phawt a ni. Ram danpui humhim duh lantirna kawngzawh hi, Churchgate-a ram danpui ruangam dintu, BR Ambedkar-a lim atangin zawh tan a ni a, Gateway of India bula Shivaji Chhatrapati lim bulah tihtawp a ni a, mi 5000 vel an pungkhawm a ni.
He kawngzawh chhang let tur hian Maharashtra BJP chuan kawng zawh dang a huaihawt ve nghal a, State Party President, Raosaheb Patil-Danve leh CM Devendra Fadnavis-te chuan Ambedkar-a hriatrengna hmunah parthi an dah a, Fanavis chuan eptu pawlte thil tih chu ram danpui humhim duhna aiin, an party humhim duh vang nia a hriat zawk thu a sawi a, Congress an sorkar lai pawhin, ram danpui ngaichang lo takin, thil dik lo takin an ti nasa hle niin a sawi bawk a ni.
