MZP chuan, sorkar chu zirtirtu semrual turin press conference hial ko in an lo au chhuah pui tawh tih an sawi a, Chief Minister leh Education Minister pawh an sawipui tawh tih sawiin heti chunga hmalakna la awm lo chu an hriatthiam loh thu an sawi a, an huntiam chhunga hmalakna hmuh tur a awm loh chuan a tawp thleng a kal an tum thu an sawi.
MZP sawi danin Aizawl a Primary school thekhatah chuan, zirlai 55 awmnaah zirtirtu 8 te, zirlai 63 awmna ah zirtirtu 10 te, zirlai 60 awmna ah zirtirtu 8 te, zirlai 15 awmna ah zirtirtu 5 te an awm a. High School ah pawh zirlai 35 awmnaah zirtirtu 9 te, zirlai 47 awmnaah zirtirtu 10 te an awm bawk a, thingtlang Primary school \henkhatah erawh chuan zirtirtu 1 in zirlai 40 aia tam te an enkawl, zirtirtu pahnih chiah awmna Primary school 45 leh zirtirtu 3 chauh awmna sikul 30 lai a awm a ni.
MZP chuan, College hrang hranga a nghet lova Asst. Professor lak tur reng rengah NET nei te chauh lak an duh thu leh advertisment pawh chhuah ngei tura an phut thu an sawi a, dinhmun sang zawk phut a Lumpsum school ten zirna in an khar avanga zirlai 850 velin zirna an chhunzawm thei lo leh an exam thei lo chu pawi an tih thu sawiin thu neituten hma la thuai se an duh thu an sawi bawk. Meeting hi an pawl President L Ramdinliana Renthlei in a kaihruai a ni.
