Naupang kum tling lo khuaikhema puh, Malsawmtluanga, kum 24, Aizawl Dinthar Transport Muala cheng nia insawi chu Special Judge (Protection of Children from Sexual Offences Act) Pi Lucy Lalrinthari Court-in kum 10 chhung tang tur leh cheng 1,000 chawi turin a hrem. Sorkar ukil, Addl. Public Prosecutor, Pu H. Lalmuankima hnen atanga thu dawn danin, Malsawmtluanga hian kum 2014 May ni 4 tlai lam khan Aizawl veng pakhata hmeichhe naupang kum 7 mi chu a thiante nen an infiam lai, thil leisak tura thlemin hmun finrialah a khuaikhem a, he thil thleng chungchangah hian vanduaina tawk hmeichhe naupang nu hian Vaivakawn Police Station-ah thubuai a thehlut a, hemi zan vek hian pawi khawihtua puh hi YMA-in an man hnuah Police kutah an hlan chhawng nghal a ni. Special Judge chuan, thil sual ti-a puh leh thuhretu hrang hrangte thusawi leh Doctor-in a endikna atangin Malsawmtluanga hi puh a nihnaah a inhnamhnawih ngei tih a finfiah a, kum 10 chhung tang tur leh cheng 1,000 chawi turin a ti a. A pawisa chawi tur hi a pek theih loh chuan ni 10 dang a tan belh ang.
