Road Safety Week puala Aizawl Traffic Police-in ngaihdamna tel lo lirthei endik runpui, No Tolerance Drive an kalpui mekah vawiin thleng khan dan bawhchhia 120 an man a, heng mite pawisa chawi tlingkhawm chu Rs. 19,400 a ni. Traffic hotute chuan, No Tolerance Drive-ah hian tum danga an tih thin angin, lirthei khalhtute chu Driving License leh lehkha pawimawh hrang hrang an neih leh neih loh an enfiah a, danin a phut ang lehkha nei lote chu manin, a phu tawk pawisa chawi tir zel an ni tih an sawi. No Tolerance Drive chhung hian Aizawl khawpui chhung hmun remchang laiah a inchhawka Duty a nih bakah Mobile checking neih thin a nih thu a sawi a, tun tumah hian thawktu indaih lohna avangin lirthei zawng zawng an endik hman lova, lirthei ke hnih nei chi chauh an enfiah hman niin an sawi. Puan tawh angin, lirthei chetsualna thleng thei laka fimkhurna hapta, Road Safety Week chu Thawhtanni atang khan Mizoram pumah hman tan a ni a, he hapta hi hlawk zawka hman a nih theih nan Aizawl Traffic Police chuan No Tolerance Drive hi a kalpui ve nghal a, Road Safety Week hi naktuk Pathianni thleng chhunzawm tur ni mah se, lirthei endik runpui hi chu vawiin thleng neih tur a ni.
