North Korea buaina to sosang lo turin US President, China-in chah

China President, Xi Jingping-a’n US President, Donald Trump-a chu tawng fimkhur turin a chah a, North Korea chungchanga buaina tisosang zawnga tawng lo turin a ngen. Ram pahnih hruaitute hi phone-ah inbiain, North Korea chungchang an sawi dun a, President Xi-a hian he thila inhnamhnawih ram zawng zawngte chu insum hram tura a duh thu leh, a muanawm thei ang bera he buaina chin fel dan kawng dap se a duh thu a sawi a, China leh US chuan thil tum inang a nei tih sawiin, Korea ram leh a chhehvela himna leh muanna a awm theih nana nuclear ralthuam siam chhuah leh en chhin khap chu tul an ti ve ve niin a sawi. Puan tawh thin angin, China hi North Korea thian hnai ber a ni a, mahse vawi tam tak khap a nih hnuah pawh North Korea hian missile leh ralthuam a en chhin luih zel avangin kar hmasa khan UN Security Council chuan North Korea hi hrek belh a remti a, hei hi China pawhin a pawm a ni.