North Korea-in sipai thi ruang 50 US kuta a hlante zingah France leh Australia sipaite pawh an tel mai thei tih US Defense Secretary, Jim Mattis-a’n a sawi.

Puan tawh angin he’ng ruang-te hi UN flag-a tuam vek an ni a, Mattis chuan a chhunga awm-te hi tunge an nih hriat a nih loh avangin, Pentagon-in forensic thiamna hmanga a zawn chhuah hunah chauh an chhungte tak tak hnenah hlan an tum thu a sawi a, France leh Australia-te pawhin sipai ruang hlawm loh an la neih ve tho avangin, ruang thlen tawpna tur sawi theih a la nih loh thu a sawi bawk a ni. Kum 1950-a Korean indona-ah khan ram 17-in sipai an thawn lut a, America sipai 35,000 chuang an thi a, heng zinga 7,700 chu an ruang la hlawm loh an ni.