Pakistan-a Punjab Province khawpui, Lahore-a truck bomb puakah mi 1 a thi a, midang 45 vel an hliam. Nizan khan Lahore-a Outfall Road-ah truck pakhat a puak a, bomb puak vang hian helai hmuna zirna in pakhat inchung a chim bakah, lirthei 100 chuang a chhia a, doctorte chuan hliam zinga a tam zawk hi chu an dinhmun a ngaihtuahawm lo niin an sawi.
Thuhretute chuan bomb puak hian kawlphetha pek chhuahna, 132-KV Sagian grid a tih chhiat vangin helai hmun leh a chhehvelah hian eng a awm lo niin an sawi a, tualchhung mite’n thuthar lakhawmtute an hrilh danin, truck hi a awmna ngaiah ni thum chhung vel a inhung tawh a, police an hriattir hnuah pawh dah sawn a ni lo a ni. Pakistan-a rorel lai party, Pakistan Muslim League-Nawaz hnathawkte chuan he truck hi Pathianni-a Lahore tlawha zin tum, PM hlui, Nawaz Sharif-a beih nana ruahman a nih an rin thu an sawi a ni.
