PM Modi-a’n BJP MP te zilh

0
1159
views

PM, Pu Narendra Modi-a’n Parliament session-a tel lo BJP MP-te chu na takin a zilh a, kum 2019 Lok Sabha inthlanah candidate an ni leh ngei ang tih beisei mai lo turin a hrilh. Dan pawimawh tak tak ngaihtuah laia Parliament-a an awm loh chungchangah PM chuan, anmahni duh thu-a session-a tel lo an nih ang chiahin, ani pawhin Lok Sabha inthlan leh hunah a duh angin thu a titlu dawn tih a sawi a, an hnathawh dan a zirin candidate hi thlan a nih tur thu sawiin, amah chu dem lo turin MP-te chu a chah bawk. Rajya Sabha-a National Commission For Backward Classes Bill chungchang ngaihtuah a nih laiin House-ah BJP MP-te an tlem avangin PM hi a lungawi lo hle a, he bill pawimawh tak ngaihtuah lai hian BJP leh NDA member 31 lai an awm loh avangin, ram danpuiin a phut angin a tlang zo ta lova, hei vang hian PM hi a lungawi lo zual a ni. BJP President, Amit Shah pawhin MP te hi na takin a lo zilh tawh a, an bial theuhah candidate tur, mi tha dang tam tak an awm laia candidate an ni chu an lawm tur a ni tih sawiin, inthlan leh pawh an chuh leh thei ang tih erawh chu beisei ringawt lo turin a lo hrilh tawh a ni.