Prism thuchhuah tarlan danin, Lunglei Venglai-a mi inluaha cheng nia insawi Peter Kaphranga chuan tun thla ni 6 khan Chief Minister, Pu Zoramthanga hnenah a chenna veng Lunglei Venglai-a Govt. Primary School ram chu inhmun atan a dil a, Chief Minister a hmuh hma hian Lunglei District High Powered Committee Vice Chairman, Pu Lawmawma Tochhawng a hmu hmasa a. HPC Vice Chairman chuan Chief Minister hnena dilpuina ziakin “Pu Petera dilna hi tihhlawhtlin sak dan awm thei se, a lawmawm ngawt ang” tiin a ziak a. Hemi thuah hian Chief Minister chuan dik lo taka a thuneihna hmangin pen tui hring ngatin ASO-I, Lunglei hmuh turin, “Recommended for favour of special consideration,” tih a ziak a, a hming ziak hnanin, Chief Minister seal a chhut hnan a ni.
Mipui vantlang ram mimal hnena sahthlak a nih theih nan dik lo taka hma laah Chief Minister hi PRISM party hian an puh a, a thuziak hi sut nghal tur leh dik lo taka a thuneihna hmanga duhsak zawng tana mipui vantlang ram sahthlak tumnaa a inrawlh avangin mipui laka ngaihdam dil turin an phut tih an sawi.
