Pu Hawla’n Helen Lowry College of Arts & Commerce a hawng

0
156
views

Aizawla Nisarih tlanga Helen Lowry College of Arts & Commerce chu nimin khan CM, Pu Lal Thanhawla’n a hawng. He College thar hi Mizoram University hnuaia inziak lut College a ni a, a hawnna thu sawiin Pu Lal Thanhawla chuan, hmasawnna atana Mizorama hnathawhna atan Science leh Commerce Graduate, chhawr tlak tam tak mamawh niin a sawi a, he College dintute chu faina leh thianghlimna te, hriselna lam ngaih pawimawh kawngah te, zuk leh hmuam lama insum kawngah te mipuite hriat hlawh an nih avangin zirlaite pawhin entawn tur tha tak an nei dawn niin a sawi. CM chuan mahni awmna chhehvela hnam dangte tawng chi hrang hrang thiam tum turin zirlaite chu a fuih a, hnam dangte chu tawngpawng nek ringawt lova zirna leh thiamna lama khum tum turin a fuih a ni. Helen Lowry College-ah hian zirlai 50 an awm a, a hawnna inkhawmah hian Principal, Dr. Biakzidinga Renthlei-in College an din chhan leh an hmathlir a sawi a, Mizo Conference of SDA President, Pastor R.Biakthansanga pawhin thu a sawi a ni.