January ni 17 leh 18 chhunga USA Chicago University Center-a Annual Smart City Symposium & Exhibition vawi 2 na neih a kal AMC Councillor – 2, Pu Rosiamngheta leh Pu Laltlanzova Khiangte ten vawiin khan Aizawl Press Club-ah an zinaah an thil tawn hrang hrang thuthar lakhawmtute an hrilh. Pu Laltlanzova Khiangte chuan, Annual Smart City Symposium & Exhibition tel turin Pu Rosiamngheta nen sawm an nih anga an tel ve thu leh India atangin an pahnih chauh an nih thu sawiin an cham chhungin khawpui hrang hrang Mayor te atangin khawpui enkawl dan leh thil pawimawh hrang hrang an sawi te ngaihthlak thin a nih thu leh Aizawl khawpuia tih ve theih tur pawh thil tam tak a awm thu a sawi a. Pu Laltlanzova Khiangte chuan, Smart city nei turin thuneituten tlachawpa thil kalpui a fuh loh thin thu leh khawpui hmasawnna turin zauzawka zir chian hnu-ah khawpui leh mipuite tana tha tur bera kalpui thin chu thil pawimawh tak a ni a ti a, hemi atan State sorkar, Municipal leh mipuite zai khata an kal a pawimawh hle dawn a ni tih a sawi. Zawhna chhangin Pu Rosiamngheta chuan, Aizawl khawpui hmasawnna turin faina kawnga hmalak hmasak chu thil pawimawh hmasa nia hriat thu a sawi a, hei bakah mipuiten dan zawm ngaih pawimawh a tul thu te, midang te ngaihchan thiamna leh inzah tawnna neih a pawimawh tih sawiin khawpuia mi cheng te chanchin chhinchhiahna Smart DATA neih a tul thu sawiin hei hian misual man chhuah kawngah leh ram leh hnam himna atan nasa takin a pui thei dawn niin a sawi bawk.
