CIA Director Gina Haspel chuan thawhlehni khan Khashoggi-a chungchang thuneitute sawipui turin Turkey a tlawh a, hetah hian MIT chuan video thlalak leh an thil chhinchhiah dangte an lo pe a ni. Turkey President Recep Tayyip Erdogan chuan thawhlehni vek khan Khashoggi chu ruahman lawkna nei chunga thah a nih thu leh a inhnamhnawih nia an hriat mi 18-te chu Saudi Arabia-in an rama rorelna hmachhawn tura a thawn a phut thu a sawi a ni. Puan tawh angin Khashoggi hi a ruang hmuh a la ni lo a, tun thla ni 2 khan Turkey khawpui, Istanbul-a Saudi Consulate chhunga a lut chu a chin hriat zui a ni ta lo a, Saudi Arabia sorkar chuan a chin hre lo nia vawi tam tak a sawi hnuah, Cosulate pisa chhunga buaina chhuakah a thi niin a sawi leh a ni. US President Donald Trump pawhin Saudi Arabia thil tih dan hi nasa takin a sawisel a, Khashoggi-a thihna thup an tum dan chu mumal lo a tih thu leh ruahmanna siamtute pawh an mangang hle a a rin thu te a lo sawi tawh a ni. MIT-in he thil a chhuinaa a finfiahna neih te CIA a pek hnu lawkah hian US sorkar chuan thawhlehni khan Saudi Arabia thuneitute \henkhat chu an ram tlawh thei lo tura an VISA hnuhkir sak an nih thu a puang nghal a, sum lama inhrekna lek a nih leh nih loh tur thu an la ngaihtuah mek tih US Secretary of State Mike Pompeo chuan a sawi bawk a ni.
