Spain Foreign Minister, Alfonso Dastis-a chuan an ram bung khan, indan tintuah mek, Catalan hruaitu, Carles Puigdemont-a chu verther taka thil ti-ah a puh a, a thil tih hian sum leh pai leh mipui nunah pawh buaina leh harsatna a thlen thei dawn niin a sawi a, Catalan hruaitu hian zalenna puan an tum chu an \hulh thu sawi leh mah se, a pawi tho niin a sawi. French radio Europe 1 hnenah Alfonso Dastis-a chuan, Puigdemont-a thupuan, zalenna puan mai an tum tawh chu an \hulh leh rih thu hi a hma ang bawka rilru dik lo tak pu-a thil tih niin a sawi a, hei hi a tih dan pangngai bawk nia sawiin, sum leh pai leh mipui nun nghawng buai thei thil niin a sawi. Puigdemont-a hian zalenna puan \hulh rih a nih thu a puan rual hian Spain sorkar nena inbiak a duh thu a sawi a, Spain PM, Mariano Rajoy chuan Spain ram inpumkhatna vawng him tur leh, ram \hen hran tumna dodal turin a thuneihna hnuaia a tih theih apiang a ti dawn tih a sawi a, a \ul chuan thuneihna \henkhat nei, Catalan bial thuneihna pawh hi chhuhsak mai a nih tur thu a sawi.
Hetih lai hian Spain ram a\anga Catalonia indan duhtu pawl mi eng emaw zatin Greece khawpui, Athens-a Spain sorkar hmunpui an luhchilh a, buaina lian tham siam loin, Catalonia ram din an thlawp thu inziahna lehkha an theh darh niin thuneituten an sawi. Police te chuan he thila inhnamhnawih nia hriat mi 19 an man tawh thu leh heng mite hi Rouvikonas tih pawl zinga mi an nih thu an sawi a ni.
