The Mizoram Parliamentary Secretaries Act, 2009 chu ram danpui kalh a nih vangin MNF-in thiah phut- Pu H Rammawi

0
687
views

MNF National Core Committee member, Pu H Rammawi-a’n, The Mizoram Parliamentary Secretaries Act, 2009 chu ram danpui kalh a nih avangin thiah an phut tih vawiin khan Aizawl Press Club-ah thuthar theh darhtute a hrilh a, thiah a nih theih nan Gauhati High Court-ah pawh kum 2009 khan an khing niin a sawi. Pu H Rammawi chuan, Court-a an thu thlen chu Supreme Court-a thu inchiah mek a nih avangin a thutlukna nghak rih turin kum 2009 November ni 5 khan High Court chuan Order a tichhuak tih a sawi a, Supreme Court-in kumin July ni 26 khan Assam Parliamentary Secretaries Act, 2004 chu ram danpui kalh a nih thu a puan tak avang leh, Assam Parliamentary Secretaries Act, 2004 leh Mizoram Parliamentary Secretaries Act, 2009 chu kalphung inang a nih avangin ram danpui kalh tia an lo sawi thin chu a rawn nemnghet ta niin a sawi. Gauhati High Court-in thupek a lo siam tawh angin The Mizoram Parliamentary Secretaries Act, 2009 chu nuai bo a nih theih nan tun hnaiah an thlen leh tih sawiin, ngaihtuah remtih a ni tawh bawk niin a sawi. Nimina Parliamentary Secretary-ten banna an theh luh chungchang sawiin Pu H Rammawi chuan, Court-in bang tura Order a chhuah hnan hmaa bang ta-ah an ngaih thu a sawi a, banna theh lut tawh mah se, Mizoram Parliamentary Secretaries Act, 2009 chu nuaibo a nih theih an bei zel dawn tih sawiin, Mizoram sorkarin kum 2009-a Parliamentary Secretary a neih atanga kumin thlenga anmahni enkawl nana sum a sen ral chu cheng vbc. 30 chuang a tling tawh niin a sawi bawk.